Бэрлін афіцыйна адмовіў рэжыму Лукашэнкі ў прыняцьці на сваю тэрыторыю 2 тысяч мігрантаў з краін Блізкага Ўсходу. Пра гэта паведаміў прадстаўнік нямецкага ўраду, піша Deutsche Welle.
Міністэрства замежных спраў Нямеччыны трымае кантакт зь беларускімі ведамствамі праз сваю амбасаду ў Менску. Гэта стала вядома са словаў афіцыйнай прадстаўніцы міністэрства Андрэа Засэ.
Раніцай 22 лістапада кіраўнік МЗС Нямеччыны Гайка Маас назваў дзеяньні Лукашэнкі ў мігранцкім крызісе «цынічным выкарыстаньнем людзей».
Раней непрызнаныя ўлады Беларусі заявілі, што ня будуць выконваць свае міжнародныя абавязаньні па ахове мяжы і вырашылі спрыяць пропуску мігрантаў у Эўразьвяз, спасылаючыся на ўласнае жаданьне саміх мігрантаў трапіць да сваякоў у Нямеччыну. Гэта справакавала буйны памежны канфлікт з сумежнымі Польшчай, Латвіяй і Літвой.
Пасьля гэтага Аляксандар Лукашэнка, Уладзімер Макей і іншыя прадстаўнікі непрызнаных ЭЗ і ЗША ўладаў пачалі вінаваціць у стварэньні крызісу зь мігрантамі краіны Захаду.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў