Лінкі ўнівэрсальнага доступу

Беларусь аднавіла пастаўкі электраэнэргіі ва Ўкраіну праз два дні пасьля спыненьня


Ілюстратыўнае фота.
Ілюстратыўнае фота.

Кампанія «Белэнэрга» аднавіла пасьля двухдзённага перапынку пастаўкі электраэнэргіі ва Ўкраіну.

Паводле беларускага боку, пастаўкі адноўленыя з 21 лістапада адпаведна падпісаным кантрактам.

Паводле нацыянальнай энэргетычнай кампаніі «Укренерго», беларускія пастаўкі ажыцьцяўляюцца ў тым жа аб’ёме, што і да спыненьня.

Украінскія экспэрты перакананыя, што спыненьне паставак зь Беларусі былі выкліканыя аўтаматычным адключэньнем Беларускай АЭС.

«Гэта азначае, што ў Беларусі не было лішку, каб ажыцьцяўляць пастаўкі на экспарт. Калі падключылі блёк, то і аднавіліся пастаўкі», — сказала Свабодзе экспэртка ў энэргетычных пытаньнях Вольга Кашарна.

Міністэрства энэргетыкі Беларусі 17 лістапада заявіла аб спыненьні з 18 лістапада паставак электраэнэргіі ва Ўкраіну. У той жа дзень стала вядома аб аўтаматычным адключэньні першага энэргаблёку БелАЭС. За дзесяць месяцаў эксплюатацыі энэргаблёк спынялі ўжо восем разоў.

Беларусь пачала прадаваць Украіне электраэнэргію на камэрцыйнай аснове 6 лістапада. За гэты час Украіна набыла больш як 80 мільёнаў кВт-гадзін, а з пачатку 2021 году — 522,6 мільёна кВт-гадзін. Пастаўкі ажыцьцяўляюцца толькі праз прыватныя кампаніі, у тым ліку праз «Тет груп», створаную Віталём Бутэнкам, адным з былых мэнэджараў кампаніі ўкраінскага мільярдэра Рыната Ахметава, і ТАА «ЕЛЕКТРО КОМ’ЮНІТІ» Аляксандра Ткачэнкі (гэтую кампанію зьвязваюць з дэпутатам Яўгенам Шаўчэнкам, які сёлета ў красавіку сустракаўся з Аляксандрам Лукашэнкам і цяпер кантактуе зь Юрыем Васкрасенскім).

Украіна мусіць пастаўляць электраэнэргію з-за мяжы, каб збалянсаваць працу Аб’яднанай энэргетычнай сыстэмы ва ўмовах дэфіцыту вугалю і сэзоннага павелічэньня спажываньня электраэнэргіі. У той жа час ва ўкраінскай кампаніі «Укренерго» адзначаюць, што пакуль узровень спажываньня на 1,6 % меншы за прагназаваныя паказьнікі і складае крыху больш як 7 мільярдаў кВт∙гдз.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG