Паход мігрантаў на памежны пункт пропуску
Каля 12:40 беларускага часу вялікая група мігрантаў накіравалася на памежны пераход Брузгі — Кузьніца з мэтай прасіць прапусьціць іх у Польшчу. Раней мігранты гаварылі аб тым, што не плянуюць затрымлівацца ў суседняй краіне, а хочуць трапіць у Нямеччыну, дзе многія зь іх ужо маюць сваякоў. Большасьць мігрантаў з Блізкага Ўсходу — курды з Іраку і Сырыі. Пры гэтым за папярэдні тыдзень было нямала спробаў сілавога прарыву мяжы, мігранты пасьля інструкцый беларускіх сілавікоў разразалі калючы дрот і намагаліся прарвацца ў Польшчу незаконна.
Польскія сілавікі ня маюць намеру пускаць мігрантаў
З польскага боку каля мяжы расьцягнулі калючы дрот, сілавікі стаяць у шарэнгах, на падмацаваньне прыбыў вадамёт, тэрыторыю патрулюе верталёт.
Мігранты селі ля агароджы
Беларускае дзяржаўнае агенцтва БелТА прыводзіць відэа, на якім бачна, як мігранты сядзяць ля калючага дроту каля памежнага пераходу.
Мігранты працягваюць падыходзіць на памежны пункт
Мігранты працягваюць сядаць на дарогу перад памежным пераходам. Гэта бачна на онлайн-камэрах з памежжа. На мінулым тыдні Польшча зачыніла рух праз памежны пераход Кузьніца з прычыны міграцыйнага крызісу.
Беларускія памежнікі згортваюць дрот са свайго боку
Беларускія памежнікі пачалі прыбіраць драцяную агароджу са свайго боку; пэўна, гэта робіцца, каб яшчэ больш мігрантаў маглі падысьці да польскай загароды. Мігранты працягваюць прыбываць пад самы памежны пераход і сядаюць там на зямлю.
Польскі бок заявіў пра стрэлы зь беларускага боку
Міністэрства абароны Польшчы паказала відэа зь мяжы, на якім чуваць стрэлы. Сьцьвярджаецца, што страляніна ідзе зь беларускага боку. Палякі расцэньваюць гэта як правакацыю далейшага канфлікту.
Як арганізавалі працу дзяржаўных прапагандыстаў. ВІДЭА
На беларускім баку арганізавалі прэсавы цэнтар для дзяржаўных СМІ, дзеля іхных здымак жанчын і дзяцей накіравалі бліжэй да агароджы. У польскім Міністэрстве абароны назвалі гэта выкарыстаньнем людзей як інструмэнту. Дзяржаўныя СМІ ўжо некалькі дзён прысьвячаюць большасьць сваіх выпускаў крызісу на мяжы, вінавацячы ў праблемах Польшчу і іншыя дзяржавы Эўразьвязу.
Лягер апусьцеў
Імправізаваны лягер, якім сталі мігранты каля калючага дроту на мяжы, пасьля паходу на памежны пункт апусьцеў.
Мігранты прыбываюць. Відэа з польскага боку
Працягваецца рух мігрантаў усутыч да памежнага пераходу з Польшчай. Пра гэта сьведчыць відэа, зьнятае польскімі памежнікамі.
На пераходзе 2100 мігрантаў
Згодна з дадзенымі беларускага Памежнага камітэту, на памежным пункце Брузгі сабраліся 2100 чалавек.
«Раніцай у панядзелак 15 лістапада ўцекачы, спадзеючыся на станоўчы зыход сытуацыі, сабралі цёплыя рэчы, намёты, спальныя мяшкі. Ужо да поўдня яны самаарганізаваліся ў вялікую калёну і пачалі рух у напрамку пункту пропуску Брузгі. Уцекачы падкрэсьліваюць свае выключна мірныя намеры і гатовыя да разьвіцьця любой сытуацыі. На чале калёны — жанчыны з малымі дзецьмі», — так фармулююць убачаныя падзеі беларускія памежнікі.
Беларускія сілавікі за сьпінамі мігрантаў
Як сьведчыць здымка зь верталёта польскага патруля, практычна ўся пляцоўка памежнага пераходу ўжо занятая, частка людзей яшчэ знаходзіцца не на дарозе, а побач на траве. Насупраць стаяць польскія паліцыянты, а за сьпінамі мігрантаў — беларускія сілавікі ў камуфляжы.
Мігранты перад пераходам. ФОТА
Паводле беларускіх памежнікаў, на памежным пераходзе каля 14-й гадзіны знаходзяцца 2100 мігрантаў.
Польскія паліцыянты гуртуюцца
Паліцыя Польшчы пачала паведамляць мігрантам пра недапушчальнасьць знаходжаньня каля польскай мяжы і зьняпраўдзіла інфармацыю пра аўтобусы, якія нібыта выехалі па мігрантаў зь Нямеччыны. Людзей папярэджваюць аб тым, што іх ашукалі беларускія сілавікі.
Патруляваньне мяжы
18-я мэханізаваная дывізія польскага войска працягвае патруляваньне мяжы зь Беларусьсю. Пад увагай памежнікаў у тым ліку чыгунка і рака Буг, дзе рэгулярна адбываецца патруляваньне з мэтай не дапусьціць парушэньня дзяржаўнай мяжы Польшчы.
Польскія памежнікі заклікаюць беларускіх апамятацца
Акрамя папярэджаньняў мігрантам, польскія сілавікі просяць беларускіх захоўваць розум і не штурхаць людзей на памежны пераход у парушэньне ўсіх нормаў.
Здымак пераходу зь верталёта
Па стане на 14:40 беларускага часу на мяжы застаецца вялікая група мігрантаў зь беларускімі сілавікамі за сьпінамі.
Мігранты ставяць намёты
Перад самым памежным пунктам пропуску мігранты пачалі ставіць намёты. Тэмпэратура паветра ў памежным раёне 2-3 градусы вышэй за нуль.
Начная спроба прарыву мяжы
Памежная варта апублікавала відэа з ночы з 14 на 15 лістапада. Палякі кажуць, што група з 60 мігрантаў паспрабавала прарвацца цераз калючы дрот, аднак гэта не ўдалося — на варце былі польскія службы.
МЗС Беларусі: «Белавія» ніколі не перавозіла нелегалаў, можам прадставіць гарантыі
Прэс-сакратар Міністэрства замежных спраў Беларусі Анатоль Глаз адмаўляе віну нацыянальнага авіяперавозчыка «Белавія» ў транспартаваньні мігрантаў з Блізкага Ўсходу да беларуска-польскай мяжы. Ён назваў справаводзтва авіякампаніі цалкам празрыстым і паведаміў, што на «Белавія» ў «апошнія месяцы істотна ўзмоцнены кантроль».
Таксама, згодна са словамі Глаза, Беларусь узмацніла ўязны кантроль у краіну, а дзясяткі турыстычных фірмаў улады пазбавілі ліцэнзій. На думку прэс-сакратара, і «Белавія», і дзяржаўныя органы вельмі сур’ёзна ставяцца да праблемы міграцыі. Авіяперавозчык абяцае прадставіць гарантыі ў выпадку запыту.
Глаз панаракаў на тое, што Беларусь ня толькі не зарабляе на міграцыі, але і нясе ад яе страты.
«Любыя абвінавачваньні ў нейкай „інструмэнталізацыі“ Беларусьсю мігрантаў беспадстаўныя, неабгрунтаваныя, супярэчаць рэальнасьці і здароваму глузду. І мы не дазволім абвінавачваць нас у гэтым абсурдзе».
Падняўся дым ад вогнішчаў
Мігранты разьвялі адразу некалькі вогнішчаў, каб сагрэцца на памежным пераходзе. Памежную паласу зацягнула дымам. Больш за 2000 мігрантаў, згодна з інфармацыяй беларускіх памежнікаў, ужо тры гадзіны знаходзяцца перад польскімі сілавікамі, якія адмаўляюцца пускаць іх у Польшчу. Беларускія сілавікі, паводле вэрсіі польскіх, правакуюць мігрантаў на сілавы прарыў мяжы.