Пра гэта паведаміў Арцём Сікорскі, кіраўнік дэпартамэнту авіяцыі Міністэрства транспарту і камунікацый Беларусі.
«Цяпер у нас няма інфармацыі, што целы ідэнтыфікаваныя. Паводле нашай інфармацыі, вядзецца адпаведная работа», — цытуе Сікорскага Інтэрфакс.
Сікорскі таксама адзначыў, што працы камісіі, якая расьсьледуе катастрофу, замінаюць складаныя ўмовы надвор’я.
«Цяпер у Іркуцку мінус 16, сьнег — і гэта абцяжарвае пошук элемэнтаў канструкцыі паветранага судна, якія адсутнічаюць», — патлумачыў ён, дадаючы, што чорныя скрыні з Ан-12, які разьбіўся пад Іркуцкам, бліжэйшым часам перададуць у Маскву. Ён не ўдакладніў, ці знайшлі ўжо тыя скрыні.
Трэцяга лістапада пад Іркуцкам у Расеі разьбіўся самалёт АН-12 авіякампаніі «Гродна», што ляцеў зь Якуцку ў Іркуцк. На борце былі 9 чалавек, усе яны загінулі. У складзе экіпажа былі трое беларусаў — штурман Андрэй Сяргееў, інжынэры Дзьмітры Гарманенка і Максім Карпук.
