Лінкі ўнівэрсальнага доступу

У атачэньні дзясяткаў землякоў у цэнтры Менску памёр мужчына зь Іраку


Мігранты, ілюстрацыйнае фота
Мігранты, ілюстрацыйнае фота

У зоне фудкорту гандлёвага цэнтру «Галерэя» памёр іншаземец, паводле папярэдніх зьвестак гэта грамадзянін Іраку.

Сьведкі надзвычайнага здарэньня расказалі «Нашай Ніве», што мужчына сядзеў за сталом разам зь іншымі землякамі, якіх беларускія ўлады называюць «турыстамі».

Раптам мужчына страціў прытомнасьць і зваліўся з крэсла. Яго спрабавалі вярнуць да жыцьця, але безвынікова. Праз некаторы час прыехалі супрацоўнікі міліцыі і накрылі цела курткамі.

Пазьней інфармацыю аб сьмерці іншаземца пацьвердзілі ў сталічных праваахоўных органах. Цяпер на месцы працуе група экспэртаў Сьледчага камітэту.

Паводле папярэдняй інфармацыі мэдыкаў, сьмерць мужчыны наступіла ў выніку сардэчнага прыступу.

Тым часам каля «Галерэі» і ў іншых месцах у цэнтры гораду працягваюць заставацца дзясяткі іншаземцаў, часта яны тут цэлымі сем'ямі. Людзі сядзяць у кавярнях, гуртуюцца ля пераходаў, нават кідаюцца ў танцы, каб сагрэцца. Нягледзячы на тое, што іх называюць турыстамі, сталічнымі адметнасьцямі яны не цікавяцца.

Дагэтуль прыходзілі зьвесткі пра выпадкі сьмерцяў мігрантаў на розных участках мяжы Беларусі з краінамі Эўразьвязу — менавіта туды арганізаванымі групамі скіроўваюцца «турысты» зь Іраку, Ірану, Сырыі ды іншых краін блізкаўсходняга рэгіёну.

Як паведамляе памежная служба Польшчы, за мінулыя суткі толькі ў гэтым напрамку зафіксавана звыш 700 спробаў перасячэньня мяжы. За рэдкім выключэньнем усе ўцекачы разьвернутыя назад у Беларусь. Таксама мігранты масава ідуць у бок Літвы і Літвіі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG