Лінкі ўнівэрсальнага доступу

Муры на межах Беларусі: Літва пачала будаўніцтва, у Польшчы назвалі парамэтры, Нямеччына падтрымала праекты


Ілюстрацыйнае фота

Міграцыйны крызіс, які пачаўся ўлетку 2021 году з таго, што ўлады Белаурсі адмовіліся кантраляваць мяжу з Эўразьвязам і прапусьцілі туды тысячы мігрантаў, ня скончыўся. Больш за тое — Польшча і Літва заявілі пра пляны будаўніцтва муроў на межах. Што з гэтымі праектамі цяпер?

Літва: будаўніцтва 4-мэтровага плоту ўжо ідзе

На літоўска-беларускай мяжы зьявіліся першыя сэкцыі плоту паміж краінамі. Ён будзе вышынёй у 4 мэтры з калючым дротам наверсе, піша сайт літоўскага ўраду. Плот заменіць калючы дрот, які ў жніўні расьцягнулі літоўскія памежнікі ў гэтай паласе.

У лістападзе-сьнежні плот будуць усталёўваць на самых «папулярных» у мігрантаў месцах незаконнага перасячэньня мяжы, а скончаць усталёўваць сэгмэнты плоту першай чаргі да красавіка 2022 году.

Таксама ў Літве абвясьцілі тэндэр на другі этап будаўніцтва, на які падалі заяўкі 12 фірмаў. Агулам плот будзе працягласьцю 400 км.

Польшча: агароджа вышэйшая за літоўскую, але будаўніцтва яшчэ абмяркоўваецца

Намесьнік міністра ўнутраных справаў і адміністрацыі Польшчы Мацей Вонсік назваў суму, якую выдаткуе польскі ўрад на плот — звыш мільярду злотых, піша gazeta.pl.

Польскі Сэнат разглядае адмысловую пастанову, якая дазволіць такое будаўніцтва на мяжы зь Беларусьсю. Вонсік гаворыць, што агароджа плянуецца вышынёй у 5,5 мэтраў, з сыстэмай назіральных вежаў, відэакамэраў і датчыкаў руху. Таксама агароджа будзе вагацца па вазе: на ўстойлівым грунце канструкцыя будзе цяжэйшай, а больш лёгкая — у багністых і вільготных раёнах.

Сэнат 27 кастрычніка мае канчаткова ўхваліць праект, і тады будаўніцтва распачнецца. Галасаваньне 14 кастрычніка ў Сэйме дало 274 галасы за будаўніцтва пры 174 супраць, 1 дэпутат устрымаўся.

Нямеччына: падтрымлівае пляны Польшчы і просіць Брусэль аб дапамозе

Як інфармуе польскае агенцтва IAR, прэм’ер-міністар фэдэральнай зямлі Саксонія выказаўся за ўмацаваньне польска-беларускай мяжы, якая таксама зьяўляецца зьнешняй мяжой Эўразьвязу. Міхаэль Крэчмер сказаў, што рэжым Лукашэнкі выклікаў новую хвалю міграцыі. Апошнім часам рэзка павялічылася колькасьць людзей, якія дабіраюцца да Одэру празь Беларусь.

«Сытуацыя на ўсходняй мяжы ЭЗ абвастраецца, таму спатрэбяцца больш моцныя агароджы і, магчыма, нават сьцены», — сказаў Міхаэль Крэчмер пасьля сустрэчы зь кіраўніком Эўракамісіі Урсулай фон дэр Ляен.

Прадстаўнік партыі Хрысьціянска-дэмакратычны зьвяз заявіў, што ў ЭЗ ёсьць усе «інструмэнты і магчымасьці» абараняць свае межы. На ягоную думку, Польшча павінна атрымаць адэкватную падтрымку з боку Брусэля.

«Хацелася б, каб у ЭЗ быў моцны касьцяк і каб яго не шантажавалі менскім дыктатам», — сказаў Крэчмер, дадаўшы, што зімой варта паклапаціцца і пра дэпартацыю нелегальных мігрантаў.

Міграцыйны крызіс — 2021. Асноўнае

  • У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
  • Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
  • Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
  • У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
  • Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
  • Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
  • Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
  • 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
  • 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
  • На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
  • 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
  • У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
  • 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
  • 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
  • 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
  • Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
  • 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
  • Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
  • 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
  • 18 і 22 лістапада ўрад Іраку зладзіў два эвакуацыйныя рэйсы, якія агулам вывезьлі зь Беларусі звыш 500 мігрантаў, на 25 і 26 лістапада заплянаваныя яшчэ 4 рэйсы.
  • 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG