Кансультант Радыё Свабода, палітзьняволены Ігар Лосік знаходзіцца за кратамі з 25 чэрвеня 2020 году. Суд у яго справе ідзе ў гомельскім СІЗА ўжо амаль чатыры месяцы. У аўторак 19 кастрычніка група прадстаўнікоў Эўразьвязу сустрэлася з блізкімі палітвязьняў, у тым ліку з Дар’яй Лосік.
«Учарашняя сустрэча прайшла з прадстаўнікамі ЭЗ, — расказала Дар’я ў размове са Свабодай. — Мы абмяркоўвалі, як яны могуць дапамагчы зьняволеным. Родныя некаторых расказвалі свае гісторыі. Прозьвішчы я не магу назваць, ня ўсе хацелі, каб пра іх ведалі. У асноўным кожны расказваў, што нас насьцярожвае на гэты момант. Чаго мы баімся, чаго б мы хацелі ад Эўразьвязу».
Дар’я Лосік апісвае сустрэчу як сяброўскую, даволі нефармальную. На ёй таксама размаўлялі пра тое, як можна паўплываць на сытуацыю з палітвязьнямі, спрыяць іх хутчэйшаму вызваленьню.
«Я гаварыла, што вельмі важна, каб імёны Ігара і іншых палітвязьняў згадваліся як мага часьцей, — расказала Дар’я Лосік. — І што галоўнае зараз для ўсіх — гэта дастаць людзей з турмы. Я таксама расказала, у якім стане Ігар цяпер знаходзіцца ў турме. Пра суд нічога не змагла паведаміць, бо я нічога пра яго ня ведаю. Зь лістоў, якія даходзяць, я бачу, што ўсё ня так добра. Ягоны псыхічны стан мяне на гэты момант турбуе больш за ўсё. Пра гэта я расказвала на сустрэчы».
Раніцай 20 кастрычніка Дар’і Лосік затэлефанавала прызначаная амбасадарка ЗША ў Беларусі Джулі Фішэр.
«З Джулі Фішэр мы размаўлялі каля 20 хвілінаў, — гаворыць Дар’я. — Я расказала, што зараз адбываецца зь Ігарам. Яна паведаміла мне, што пра Ігара ў Вашынгтоне гавораць практычна кожны дзень. І ніхто ні ў якім выпадку яго не забыў. Любымі спосабамі будуць яму дапамагаць, самае галоўнае — дапамагчы вярнуцца Ігару дадому. Джулі таксама сказала, што мы можам быць на сувязі ў любы момант. Калі раптам нешта здарыцца, альбо я буду ведаць пра тое, што зь Ігарам нешта адбывалася, я заўсёды магу адразу пра гэта ёй паведаміць».
Дар’я таксама гаворыць, што была вельмі радая тэлефанаваньню ад дыпляматкі. Акурат напярэдадні яна атрымала адразу пяць лістоў ад мужа і змагла расказаць пра стан Ігара больш.
«Мне было вельмі прыемна, — кажа Дар’я Лосік. — Я радая, што пра Ігара часта згадваюць. Гэта вельмі добра».
Пра завяршэньне працэсу ў справе Ігара Лосіка і іншых палітзьняволеных, якіх судзяць разам зь ім, нічога не вядома. Паводле неафіцыйнай інфармацыі, прысуд можа быць агучаны ўжо да канца месяца. На пачатку лістапада споўніцца роўна 500 дзён, як Ігар Лосік знаходзіцца ў няволі.
Крымінальны перасьлед Ігара Лосіка
На журналіста Радыё Свабода і блогера Ігара Лосіка ў 2020 годзе завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).
Лосіка затрымалі 25 чэрвеня 2020 году пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.
Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.
15 сьнежня 2020 году, пасьля выстаўленьня другога абвінавачаньня, Ігар Лосік абвясьціў галадоўку пратэсту і трымаў яе да 25 студзеня 2021 году.
11 сакавіка 2021 году Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.
- 14 сьнежня 2021 году ў будынку СІЗА-3 ў Гомлі судзьдзя Мікалай Доля прысудзіў Ігару Лосіку 15 гадоў зьняволеньня. Яго прызналі вінаватым паводле двух артыкулаў Крымінальнага кодэксу — «Распальваньне сацыяльнай варажнечы і непрыязі ў адносінах да прадстаўнікоў улады і праваахоўных органаў, учыненае групай асобаў» (ч.3 арт.130) і «Арганізацыя масавых беспарадкаў, якія суправаджаліся пагромамі падпаламі, зьнішчэньнем маёмасьці і ўзброеным супрацівам прадстаўнікам улады» (ч.1 ст.293).
- Жонку Ігара Лосіка Дар’ю пакаралі 2 гадамі зьняволеньня ў калёніі агульнага рэжыму (паводле арт. 361-4 Крымінальнага кодэксу, «Садзейнічаньне экстрэмісцкай дзейнасьці») за інтэрвію пра мужа, у якім яна, паводле абвінавачаньня, «пазыцыянавала сябе як жонка палітвязьня». Прысуд Дар’і Лосік вынес 19 студзеня 2023 году судзьдзя Берасьцейскага абласнога суду Мікалай Грыгаровіч.
