Лінкі ўнівэрсальнага доступу

Расейскі алігарх Гуцэрыеў падаў у суд на Раду Эўразьвязу, патрабуе скасаваньня санкцый за падтрымку Лукашэнкі


Міхаіл Гуцэрыеў.
Міхаіл Гуцэрыеў.

Таксама тры беларускія кампаніі — МАЗ, БелАЗ і «Белаэранавігацыя» — патрабуюць ад Рады Эўразьвязу, каб іх выключылі з санкцыйных сьпісаў і адмянілі ўведзеныя супраць іх абмежаваньні.

Як паведамляецца ў афіцыйным часопісе Эўразьвязу, пазовы зарэгістравалі ў канцы жніўня — пачатку верасьня.

Міхаіл Гуцэрыеў патрабуе скасаваць санкцыі, спасылаючыся на тое, што Рада Эўразьвязу нібыта дапусьціла памылку, палічыўшы, што крытэры яго ўключэньня ў санкцыйны сьпіс выкананыя, — а гэта, паводле яго, парушыла ягоныя асноўныя правы, у тым ліку правы на асабістае жыцьцё, абарону, уласнасьць і свабоду вядзеньня бізнэсу.

24 чэрвеня Рада Эўразьвязу зацьвердзіла эканамічныя сэктаральныя санкцыі супраць беларускіх уладаў. Санкцыі закранулі вядучыя экспартныя галіны: калійную, нафтаперапрацоўчую, машынабудаўнічую.

Санкцыі пазбавілі БелАЗ і МАЗ паставак заходніх рухавікоў, якімі камплектаваўся мадэльны шэраг.

Тым часам структуры Эўразьвязу рыхтуюць пяты пакет санкцый у дачыненьні да беларускага рэжыму — за стварэньне міграцыйнага крызісу і далейшы наступ на асноўныя свабоды ў краіне.

Міхаіл Гуцэрыеў спачатку трапіў пад санкцыі Вялікай Брытаніі, уведзеныя ў дачыненьні да ўладаў у Менску. Пасьля ўключэньня ў санкцыйныя сьпісы Міхаіл Гуцэрыеў выйшаў з рады дырэктараў «РуссНефти», якая працяглы час пастаўляла ў Беларусь нафту.

У апублікаваным у канцы чэрвеня 2021 году новым санкцыйным сьпісе ЭЗ гаворыцца, што Міхаіл Гуцэрыеў — «даўні сябра Лукашэнкі» і што гэта дазволіла яму «займець значны капітал і ўплыў сярод палітычнай эліты Беларусі». Гуцэрыева таксама абвінавацілі ў падтрымцы Лукашэнкі падчас «нафтавых войнаў» паміж афіцыйным Менскам і Крамлём. Узгадалі эўрапейцы і гісторыю з уцёкамі расейскага алігарха з Расеі празь Менск, а таксама будаўніцтва камбінату каля Любані.

Санкцыі Эўразьвязу супраць рэжыму Лукашэнкі

Эканамічныя сэктаральныя санкцыі

Эканамічныя сэктаральныя санкцыі былі ўведзеныя Эўразьвязам пасьля інцыдэнту з прымусовай пасадкай самалёта Ryanair у Менску 23 траўня 2021 году і наступнага затрыманьня журналіста Рамана Пратасевіча і ягонай партнэркі Соф'і Сапегі, а таксама з прычыны парушэньняў правоў чалавека і рэпрэсій.

У матывацыйнай частцы прынятага рашэньня прыгадваюцца, у прыватнасьці, эскаляцыя сур’ёзных парушэньняў правоў чалавека ў Беларусі і жорсткія рэпрэсіі супраць грамадзянскай супольнасьці, дэмакратычнай апазыцыі і журналістаў, а таксама асобаў, якія належаць да нацыянальных меншасьцяў.

24 чэрвеня 2021 году Эўразьвяз увёў наступныя абмежавальныя захады:

  • У экспарце і перадачы абсталяваньня, тэхналёгіяў або праграмнага забесьпячэньня, прызначанага для выкарыстаньня ў інтарэсах беларускіх уладаў у маніторынгу або перахопе Інтэрнэту і тэлефоннай сувязі на мабільных або стацыянарных прыладах.
  • У экспарце ў Беларусь тавараў падвойнага прызначэньня для вайсковага выкарыстаньня.
  • У экспарце ў Беларусь тавараў, якія выкарыстоўваюцца для тытунёвых вырабаў.
  • У імпарце ў ЭЗ нафтапрадуктаў з Беларусі.
  • У імпарце ў ЭЗ калійных угнаеньняў з Беларусі,
  • У доступе на фінансавыя рынкі ЭЗ ўраду Беларусі, а таксама беларускім дзяржаўным фінансавым інстытутам і субʼектам.
  • Эўрапейскаму інвэстыцыйнаму банку забаронена фінансаваць праекты ў дзяржаўным сэктары Беларусі.

Санкцыі супраць асобаў і прадпрыемстваў

Раней, на пасяджэньні ў Люксэмбургу 21 чэрвеня 2021 году, міністры замежных спраў Эўразьвязу зацьвердзілі чацьвёрты пасьля прэзыдэнцкіх выбараў 2020 году ў Беларусі пакет санкцый супраць беларускага рэжыму.

Санкцыйны сьпіс з 78 чалавек і 8 арганізацый, якім замарожваюцца актывы і забараняецца выдача візаў у Эўразьвяз, быў апублікаваны ў афіцыйным часопісе Эўразьвязу, такім чынам ён набывае моц.

Яшчэ раней, у кастрычніку, лістападзе і сьнежні 2020 году Эўразьвяз увёў тры пакеты санкцый супраць уладаў Беларусі. Абмежавальныя захады тычацца афіцыйных асобаў, а таксама некаторых прадпрыемстваў. Агулам у санкцыйным сьпісе тады апынуліся 84 асобы, якім забаронены ўезд у краіны ЭЗ. У сьпіс уваходзіць Аляксандар Лукашэнка, ягоны сын Віктар Лукашэнка, кіраўніца ЦВК Лідзія Ярмошына, старшыня КДБ Іван Тэртэль, старшыня Сьледчага камітэту Іван Наскевіч, генэральны пракурор Андрэй Швед і іншыя сілавікі, а таксама судзьдзі і чальцы выбарчых камісіяў.

Сярод іншага, ЭЗ увёў санкцыі супраць юрыдычных асобаў: ЗАТ «Белтэхэкспарт», «Дана Холдынгз/Дана Астра», Кіраўніцтва справаў прэзыдэнта Беларусі, ТАА «Сінэзіс», ААТ «АГАТ — электрамэханічны завод», ААТ «140-ы рамонтны завод» і ААТ «Менскі завод колавых цягачоў».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG