Ягор Камароўскі, які супрацоўнічаў з DW, 12 кастрычніка выйшаў на волю з ізалятара на Акрэсьціна пасьля адміністрацыйнага арышту.
Пра гэта DW паведаміў бацька журналіста Сяргей Камароўскі.
Паводле яго, падазрэньні ці абвінавачаньні ў крымінальнай справе яму ня выставілі. Пачуваецца ён добра.
Ягора Камароўскага затрымалі вечарам 28 верасьня ў Менску. На наступны дзень яго арыштавалі на 14 сутак, абвінаваціўшы ў «хуліганстве». Абставіны і прычыны арышту блізкім Камароўскага і ягонаму адвакату былі невядомыя.
Падчас арышту ў кватэры Камароўскага правялі ператрус. Паводле бацькі Камароўскага, у пастанове былі пазначаны артыкулы Крымінальнага кодэксу «Наўмыснае зьнішчэньне ці пашкоджаньне чужой маёмасьці» і «Акт тэрарызму». Сілавікі забралі ўсю тэхніку, у тым ліку ноўтбук, відэакамэры, запісвальныя прылады і карты памяці, а таксама пасьведчаньне пазаштатнага супрацоўніка Deutsche Welle.