Запрасілі тэрміны для фігурантаў «карагоднай справы»
Суд над чарговымі шасьцю фігурантамі «карагоднай справы» ў Берасьці пачаўся 24 верасьня. Усіх абвінавачваюць ва ўдзеле летась 13 верасьня ў акцыі на скрыжаваньні бульвара Касманаўтаў і праспэкта Машэрава.
1 кастрычніка пракуроры запатрабавалі пакараць восьмую па ліку групу падсудных наступнымі тэрмінамі зьняволеньня і так званай «хіміі»:
- Алег Кулеша (апошнія 3 месяцы ў СІЗА № 7 Берасьця) — 1 год 7 месяцаў калёніі
- Мікіта Дзьмітрыеў — 2 гады «хіміі»
- Ганна Кашырскіх — 1 год 6 месяцў «хіміі»
- Сяргей Кунцэвіч — 1 год 6 месяцаў «хіміі»
- Дзьмітры Макарэвіч — 1 год 6 месяцаў «хатняй хіміі»
- Тацяна Пякарская — 1 год 6 месяцаў «хатняй хіміі».
Згодна з вэрсіяй абвінавачаньня, падсудныя ў групе зь іншымі асобамі «наўмысна ўзялі актыўны ўдзел у групавых дзеяньнях, якія груба парушаюць грамадзкі парадак».
Іх дзеяньні нібыта былі спалучаныя зь непадпарадкаваньнем законным патрабаваньням прадстаўнікоў улады, пацягнулі за сабой парушэньне працы транспарту, арганізацыяў і прадпрыемстваў.
У рамках гэтай крымінальнай справы пакаралі ўжо больш за 80 чалавек.
Бабруйскія актывісты на допыце ў КДБ
Праваабаронцам«Вясны» стала вядома, што затрыманая пасьля хатняга ператрусу ў Бабруйску Галіна Сьмірнова знаходзіцца на допыце ў мясцовым упраўленьні КДБ.
Туды ж сьледам даставілі гарадзкіх актывістаў Сяргей Бяляева і Вольгу Новікаву.
Сяргея Бяляева, які мае трэцюю групу інваліднасьці (у яго хвароба Паркінсона), затрымлівалі сёлета на Дзень Волі і арыштавалі тады на 20 сутак. Каля тыдня ён галадаў, адмаўляючыся ня толькі есьці, але і прымаць прапісаныя лекі. На такі крок мужчына адважыўся пасьля таго, як супрацоўнікі бабруйскага ІЧУ забралі ў яго перадачу ад маці.
Створаныя для асуджаных умовы ў ізалятары Сяргей Бяляеў называў «абсалютным катаваньнем».
«Хатняя хімія» за камэнтар пра міліцыянта
Суд Першамайскага раёну Менску 1 кастрычніка пакараў Дзьмітрыя Сманцара, якога вінавацілі ў публічнай абразе прадстаўніка ўлады паводле арт. 369 Крымінальнага кодэксу.
Згодна з абвінавачаньнем, 30 красавіка мужчына пакінуў абразьлівы камэнтар у тэлеграм-канале «Лухта» пад публікацыяй пра супрацоўніка міліцыі з Івацэвічаў Руслана Куцко: «Куцко — ***».
Руслан Куцко таксама прызнаны пацярпелым у крымінальнай справе супраць Вольгі Кронды, якая пакінула пад фатаздымкам міліцыянта эмодзі ў выглядзе «гаўняшкі».
У публікацыі Дзьмітры Сманцар даў спасылку на гісторыю Вольгі Кронды, а сам камэнтар паўтараў выказаную ёй думку, толькі ў выглядзе слова. Агулам пад пастом зьявілася больш за 400 камэнтароў.
Пракурор Мацьвей Худаешка прасіў суд прызнаць Дзьмітрыя Сманцара вінаватым і прызначыць яму пакараньне ў выглядзе абмежавання волі без накіраваньня ў папраўчую ўстанову тэрмінам на 2 гады.
Судзьдзя Максім Трусевіч пагадзіўся і прызначыў запрошаны тэрмін, абавязаўшы таксама выплаціць кампэнсацыю маральнай шкоды пацярпеламу ў памеры 1000 рублёў, а мабільны тэлефон канфіскаваць у даход дзяржавы як сродак зьдзяйсьненьня злачынства.
У Століне схапілі былога афіцэра
Першага кастрычніка стала вядома, што 29 верасьня ў Століне затрымалі Аляксандра Велясьніцкага — папярэдне, за камэнтар у сацыяльных сетках пра гібель Андрэя Зельцара і супрацоўніка КДБ у перастрэлцы. Па месцы пражываньня мужчыны правялі ператрус, а яго самога перавезьлі ў Менск на Акрэсьціна, піша Праваабарончы цэнтар «Вясна».
У жніўні летась Аляксандар — былы афіцэр-памежнік — адмовіўся ад мэдаля «За бездакорную службу».
«Я прыняў гэтую ўзнагароду з гонарам. Больш чым 15 гадоў годнай службы ў памежных войсках і органах памежнай службы давалі падставу лічыць, што я маю права насіць яе на сваім парадным кіцелі. Пакуль не даведаўся, што гэтым жа мэдалём у тэрміновым парадку ўзнагароджваюць тых, хто ўдзельнічае ў выкраданьнях, біцьці і катаваньнях мірных людзей, жанчын і мужчын, непаўналетніх і падлеткаў, старых», — сказаў афіцэр на відэа, якое запісаў адмыслова для асуджэньня дзеяньняў улады ў тыя дні.
Паводле падлікаў праваабаронцаў і валянтэраў, як мінімум 82 чалавекі затрыманыя за апошнія два дні па ўсёй Беларусі.
У Менску затрымалі студэнта БДУ
Першага кастрычніка стала вядома аб затрыманьні студэнта завочнага аддзяленьня БДУ Ўладзімера Запольскіх. Меркаваная прычына – «абразьлівыя» камэнтары пра застрэленага супрацоўніка КДБ, паведамляе тэлеграм-канал Law Verum.
Запольскі вучыцца на 4 курсе юрфаку. На сайце Spiski.live напісана, што на гэты момант ён у СІЗА КДБ, аднак іншыя тэлеграм-каналы зазначаюць, што паступалі зьвесткі аб яго знаходжаньні ў турме на Акрэсьціна.
Паводле непацьверджанай інфармацыі, хлопца затрымалі праз падазрэньне ў зьдзяйсьненьні злачынства, прадугледжанага арт. 130 КК («Распальваньне расавай, нацыянальнай, рэлігійнай альбо іншай сацыяльнай варожасьці»).
На Берасьцейшчыне ператрусы ў непаўналетніх
Ператрусы прайшлі ў васьмі дамах у вёсцы Кавердзякі, якая мае 1500 жыхароў. Прычынай перасьледу сталі надпісы «Жыве Беларусь» на прыпынку, пакінутыя ў ноч з 22 на 23 верасьня, паведамляе «Вясна Брэст».
Шэраг грамадзян, пераважна непаўналетніх, дапыталі. Супрацоўнікі органаў прасілі згоду бацькоў на допыт бязь іхнага ўдзелу, даючы на роздум літаральна дзесяць хвілін.
Месцаў на Акрэсьціна не хапае
Лукашэнка 1 кастрычніка заявіў, нібыта на Акрэсьціна ёсьць шмат вольных месцаў, аднак на самай справе некаторых затрыманых 29 і 30 верасьня людзей зьмясьцілі ў камэры СІЗА КДБ.
Па дадзеных праваабаронцаў «Вясны», 29-30 верасня ў Беларусі былі затрыманыя мінімум 86 чалавек.
Большасць затрыманняў звязаная з каментаваннем у сацсетках пастоў пра гібель Андрэя Зельцэра і супрацоўніка КДБ. Гэтыя затрыманні адбываюцца ў межах арт. 369 (абраза прадстаўніка ўлады) і арт. 130 (распальванне сацыяльнай варожасці) Крымінальнага кодэкса.
Затрыманьне ў Жлобіне за падпал дзьвярэй
Паводле зьвестак праваабаронцаў «Вясны», 20-гадовага жыхара Жлобіна Вячаслава Асташова, абвінавачваюць у падпале дзьвярэй адміністратыўнага будынка.
Хлопца затрымалі падчас хвалі перасьледу за камэнтары 29 верасьня і запісалі «пакаяльнае відэа», у якім ён прызнаецца, што быў падпісаны на «экстрэмісцкія» тэлеграм-каналы. У юрыспрудэнцыі лічыцца, што зьвесткі, атрыманыя шляхам гвалту, доказамі ў справе не зьяўляюцца.
Асудзілі выкладчыка курсаў «Мова Нанова»
27 верасьня ў дом Андрэя Коласа ў Ваўкавыску ўламіліся сямёра сілавікоў са шчытамі і зброяй, паведамляе Эўрарадыё са спасылкай на інфармацыю атрыманую ад сяброў затрыманага выкладчыка. Фармальная нагода для візыту – праверка паляўнічай зброі. Мужчыну затрымалі і пасьля суда пасадзілі на 10 сутак.
«Прынялі ў РУУС, дзе ўжо была загатоўка – бяскрыўдны кліп, які Андрэй разьмясьціў у сваіх сацсетках у 2018 годзе з маленькімі лягатыпам сайта, які прызналі экстрэмісцкім у 2021-м! – сказалі сябры гісторыка. – Андрэя пасадзілі ў камэру з дробным зладзюжкам і бяздомным. Зь перадачы прынялі толькі рэчы. Ежу і кнігі разьвярнулі. Кожны вечар яго водзяць на допыты, на якіх з крыкам і матам прапануюць выехаць у Польшчу або сядзець усё жыцьцё».
Па словах сяброў Коласа, у Ваўкавыску яго ведаюць як «чалавека, які выпусьціў з педкаледжа сотні юных патрыётаў». Ён выкладаў ім гісторыю і культуру Беларусі на роднай мове. Таксама гісторык шмат гадоў прапрацаваў дырэктарам турыстычнай кампаніі, якая стварыла музэй беларускай шляхты.