Як паведамляе «Голас Амэрыкі», прымаючы ўзнагароду падчас віртуальнай цырымоніі, Ціханоўская адзначыла, што яе ўжо другі раз прысуджаюць тым, хто змагаецца за свабоду ў Беларусі: мінулы раз яе атрымаў літоўскі дзяржаўны і палітычны дзеяч Лінас Лінкявічус.
«Гэта каштоўны знак падтрымкі з боку міжнароднай супольнасьці, — сказала яна. — Але барацьба яшчэ далёкая ад завяршэньня».
Ціханоўская нагадала, што са жніўня 2020 году, калі ў Беларусі разгарэліся пратэсты пасьля прэзыдэнцкіх выбараў, улады арыштоўвалі больш за 36 000 чалавек; ня менш за 10 чалавек загінулі. У якасьці прыкладу непахіснага беларускага імкненьня да свабоды Ціханоўская прывяла гісторыю актывісткі Вольгі Залатар, маці пяцярых дзяцей, якая цяпер знаходзіцца ў зьняволеньні праз абвінавачаньні, якіх яна не прызнае. Залатар — адна зь ліку 702 палітзьняволеных у Беларусі. Сярод іх 75 жанчын, і іх колькасьць працягвае расьці з кожным днём.
«Менавіта гэтым людзям я хацела б прысьвяціць гэтую ўзнагароду, — сказала Ціханоўская. — Я заклікаю дэмакратычную супольнасьць стварыць сыстэмы дапамогі грамадзянскай супольнасьці Беларусі, асабліва праваабаронцам, журналістам і актывістам».
- Як паведамляецца на вэб-старонцы Цэнтру аналізу эўрапейскай палітыкі, місія гэтай арганізацыі «заключаецца ў забесьпячэньні моцнага і ўстойлівага трансатлянтычнага альянсу, укаранёнага ў дэмакратычных каштоўнасьцях і прынцыпах са стратэгічным бачаньнем, дальнабачнасьцю і палітычным уплывам». CEPA пазыцыянуе сябе як «беспартыйная, некамэрцыйная ўстанова публічнай палітыкі». Штаб-кватэра арганізацыі знаходзіцца ў Вашынгтоне.
