«Нягледзячы на прагрэс у скарачэньні арсэналаў ядзернай зброі з часоў халоднай вайны, сукупны сусьветны запас ядзерных боегаловак застаецца на вельмі высокім узроўні: на пачатак 2021 году дзевяць краінаў валодалі прыкладна 13 100 боегалоўкамі», — адзначаецца ў дасьледаваньні.
«Прыблізна 91% усіх ядзерных боегаловак належыць Расеі і Злучаным Штатам, у кожнай зь якіх ёсьць каля 4000 боегаловак у апэратыўных вайсковых арсэналах», — канстатуюць навукоўцы.
У глябальным маштабе агульныя запасы ядзернай зброі скарачаюцца, але тэмпы скарачэньня запавольваюцца ў параўнаньні з папярэднімі 30 гадамі. Скарачэньне адбываецца толькі таму, што ЗША і РФ займаюцца дэмантажом боегаловак, зьнятых раней з узбраеньня.
Што тычыцца боегаловак, якія замацаваныя за апэратыўнымі сіламі, то іх агульная колькасьць ізноў павялічваецца, адзначаюць амэрыканскія экспэрты. Паводле іх дадзеных, у Францыі і Ізраілю запасы адносна стабільныя, а Кітай, Індыя, КНДР, Пакістан, Расея і Вялікая Брытанія павялічваюць арсэналы ядзернай зброі.
Прыкладна 2 тысячы боегаловак ЗША, Расеі, Вялікай Брытаніі і Францыі знаходзяцца ў стане павышанай гатоўнасьці да выкарыстаньня ў кароткія тэрміны.