Лінкі ўнівэрсальнага доступу

На літоўска-беларускай мяжы вялікая чарга грузавікоў, кіроўцам бракуе ежы і лекаў


Пераход у Медніках, ілюстрацыйнае фота
Пераход у Медніках, ілюстрацыйнае фота

На пераходзе паміж Меднікамі і Каменным Логам паабапал мяжы сабралася вялікая чарга грузавікоў.

У рэдакцыю літоўскага парталу агенцтва Delfi зьвярнуліся кіроўцы, якія некалькі дзён стаяць на КПП зь літоўскага боку. Сярод іх шмат хворых — ня выключана, што і на каранавірус.

«Набралася больш за 500 цягачоў, мяжа паралізаваная, нікога не прапускаюць. У нас няма ежы і элемэнтарных сродкаў гігіены. Некаторыя пачуваюцца вельмі кепска — хутчэй за ўсё, каранавірус. Людзі жывуць на пляцоўцы па 3–4 дні: да гораду з крамамі і аптэкамі далёка, стаім у полі. Тэлефануем памежнікам, кажуць, усё ў парадку, працуем у звычайным рэжыме. Праблему трэба вырашаць, а то будзе дрэнна», — напісаў адзін з кіроўцаў.

У сыстэме дырэкцыі КПП указана, што ў Медніках стаяць 318 цягачоў, прагназаваны час чаканьня — 43 гадзіны. Аднак фураў увесь час прыбывае. Намеснік дырэктара Рымантас Шаткаўскас патлумачыў, што на адным з участкаў праводзяць рэканструкцыю, а гэта адбіваецца на аўтапатоку. Ён параіў ехаць празь іншыя КПП — Лаварышкі, Райгорад, Салечнікі.

З боку Беларусі сытуацыя ня лепшая — практычна бяз руху звыш 400 аўтамабіляў на выезд у Літву.

Прадстаўнік Мытнага дэпартамэнту Вітас Валунгявічус пацьвердзіў, што ад 21 верасьня з прычыны рамонтных працаў у Медніках за содні праяжджае ўсяго 150 фураў, а стаянка разьлічаная ня больш як на 300 машын.

«Яны проста не прапускаюць машыны, усе стаяць. Мо рэканструкцыя неяк і ўплывае, але гэта ненармальна. Няхай закрыюць мяжу на тыдзень, усё зробяць, ці шукаюць іншыя варыянты, а ня зьдзекуюцца зь людзей. Па 70 гадзін кіроўцы чакаюць, у такое надвор’е элемэнтарна заразіцца адзін ад аднаго каранавірусам», — абураецца адзін зь перавозьнікаў.

Генэральны сакратар асацыяцыі Linava Зянонас Буйвідас адзначыў, што падобная сытуацыя ў Медніках фіксуецца ня першы раз. На ягонае перакананьне, рэч ня столькі ў рэканструкцыі, колькі ў дрэннай камунікацыі адказных ведамстваў. Перадусім няма інфармаваньня, каб кіроўцы выбіралі іншыя КПП, дзе ня трэба стаяць па 2–3 дні.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG