Лінкі ўнівэрсальнага доступу

Папа Рымскі прызначыў новага мітрапаліта для Беларусі


Біскуп Юзаф Станеўскі
Біскуп Юзаф Станеўскі

Папа Францішак прызначыў Юзафа Станеўскага архібіскупам-мітрапалітам Менска-Магілёўскім. Рашэньне агучыла 13 верасня 2021-га Заля друку Сьвятога Пасаду, паведамляе Ватыканскае радыё.

У ватыканскім паведамленьні зьмяшчаецца кароткая біяграфія ярарха. Ён нарадзіўся 4 красавіка 1969 г. на тэрыторыі цяперашняй Горадзенскай дыяцэзіі. 17 чэрвеня 1995 г. атрымаў сьвятарскае пасьвячэньне ў той жа дыяцэзіі і быў накіраваны ў парафію св. Вацлава ў Ваўкавыску. У 1999 годзе атрымаў ліцэнзіят у кананічным праве ў Люблінскім каталіцкім унівэрсытэце.

Далей займаў пасады выкладчыка, прэфэкта, а пасьля і рэктара Вышэйшай духоўнай сэмінарыі ў Горадні, судьзьдзі і дапаможнага вікарыя Міждыяцэзіяльнага суду першай інстанцыі. У 2007–2013 гадах адказваў за душпастырскую фармацыю маладых сьвятароў у роднай дыяцэзіі.

29 лістапада 2013 г. Францішак прызначыў Юзафа Станеўскага дапаможным біскупам Горадзенскай дыяцэзіі. 14 красавіка 2021 г. ён быў другі раз абраны генэральным сакратаром Канфэрэнцыі біскупаў.

Пасада каталіцкага мітрапаліта стала вакантнай у Беларусі пасьля адпраўкі на пэнсію архібіскупа Тадэвуша Кандрусевіча.

31 жніўня 2020 году беларускія памежнікі не прапусьцілі архібіскупа Кандрусевіча з Польшчы ў Беларусь без тлумачэньня прычынаў. Пазьней дзяржаўныя органы заявілі, што МУС прызнала пашпарт Кандрусевіча несапраўдным.

Аляксандар Лукашэнка вінаваціў Кандрусевіча ў тым, што мітрапаліт выяжджаў у Польшчу нібыта для кансультацый аб тым, «як разбураць Беларусь». Да таго Кандрусевіч асудзіў гвалт сілавікоў зь мірных пратэстоўцаў і заклікаў яго спыніць. Яму дазволілі вярнуцца праз 4 чатыры месяцы ў выгнаньні.

3 студзеня 2021 году, у дзень, калі Мітрапаліту Менска-Магілёўскаму споўнілася 75 гадоў, Францішак прыняў яго адстаўку і прызначыў адміністратара архідыяцэзіі — біскупа Казіміра Вялікасельца. Нягледзячы на дасягненьне ярархам гранічнага ўзросту для служэньня (75 гадоў), папа Францішак дазволіў яму працягваць выконваць свае функцыі прынамсі яшчэ 2 гады. Казімір Вялікаселец застаецца дапаможным біскупам Пінскай дыяцэзіі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG