У гэты дзень год таму
- Лукашэнка і Пуцін сустрэліся ў Сочы; Пуцін паабяцаў крэдыт у памеры 1,5 мільярда даляраў;
- Сьвятлана Ціханоўская заявіла ў інтэрвію тэлеканалу «Настоящее время», што лічыць сябе «народна выбраным прэзыдэнтам»;
- затрымалі сябра Каардынацыйнай рады юрыста Канстанціна Цітова;
- МУС Беларусі заявіў пра затрыманьне «ляснога атралу» «Партызанаў Магілёва».
Дзень у гісторыі
1853 ― Турэччына абвясьціла вайну Расейскай імпэрыі, пачалася Крымская вайна.
1867 ― выйшаў у сьвет першы том «Капіталу» Карла Маркса.
1906 ― у Вільні выйшаў першы нумар «Нашай долі».
1920 ― у Менску адкрыўся Беларускі дзяржаўны тэатар (цяпер Нацыянальны акадэмічны тэатар імя Янкі Купалы).
1921 ― у Вільні выйшаў першы нумар штотыднёвіка «Беларускія ведамасьці» (рэдактар Максім Гарэцкі).
1960 ― заснаваная Арганізацыя краін – экспартэраў нафты (АПЭК). У яе ўвайшлі Ірак, Іран, Кувэйт, Саудаўская Арабія і Вэнэсуэла.
У гэты дзень нарадзіліся
1769 ― Аляксандар Гумбальт, нямецкі натураліст.
1904 ― Мар’ян Пецюкевіч, беларускі этнограф і грамадзкі дзеяч.
1947 ― Ежы Папялушка, польскі каталіцкі сьвятар, забіты камуністычнымі спэцслужбамі.
1965 ― Лявон Вольскі, беларускі рок-музыка.
У памяці
1321 ― Дантэ Алігʼеры, італьянскі паэт эпохі Адраджэньня.
1927 ― Айсэдора Дункан, амэрыканская танцорка.
2000 ― Ежы Гедройц, публіцыст, палітык, заснавальнік і рэдактар знакамітага часопісу «Kultura».
2000 ― Галіна Русак, беларуская мастачка, грамадзкая дзяячка беларускай дыяспары ў ЗША.
Наваградчанка Галіна Русак у дзевятнаццаць гадоў апынулася ў ЗША. Там яна з ступенямі магістра бібліятэчных навук і гісторыі мастацтва скончыла заснаваны яшчэ ў каляніяльны пэрыяд Ратгерскі ўнівэрсытэт, дзе пазьней была дырэктаркай мастацкай бібліятэкі. (Дарэчы, у той самай alma mater пачынаў навуковую кар’еру біяхімік беларус Аўген Вярбіцкі, спэцыяліст у захаваньні ежы, які быў адказны за харчаваньне першай амэрыканскай экспэдыцыі на Месяц.)
Яна сталася вядомай дзяячкай нашай дыяспары, а таксама агульнаамэрыканскага руху за роўныя правы жанчын.
Але яе сапраўдным пакліканьнем было мастацтва — жывапіс і графіка, у якіх Галіна працавала ў імпрэсіяністычнай манеры. Беларусь прысутная ў многіх ейных пэйзажах («Буслы ў палёце», «Курган», «Папараць-кветка»), нават калі там, на першы погляд, адлюстраваная Амэрыка. Згукі далёкае Бацькаўшчыны магутна гучаць у ейных творах «Эўфрасіньня Полацкая», «Голас продкаў», «Пагоня».
Уладзімер Арлоў, Імёны Свабоды, 4-е выданьне, с. 470–471.