Форум пачаўся 6 верасьня, прысьвечаны ён ролі жанчын у барацьбе з пандэміяй і аднаўленьні пасьля яе з пазыцыі гендэрнай роўнасьці, спасылаецца БелТА на прэс-службу Савету Рэспублікі.
Летась 17 сьнежня Натальля Качанава трапіла ў санкцыйны сьпіс Эўразьвязу. Сярод падставаў указвалася, што чыноўніца як старшыня Савету Рэспублікі Нацыянальнага сходу адказвае за падтрымку рашэньняў Аляксандра Лукашэнкі ў галіне ўнутранай палітыкі і за арганізацыю сфальсыфікаваных прэзыдэнцкіх выбараў 2020 году, а таксама рабіла публічныя заявы, адстойваючы жорсткія разгоны мірных дэманстрацыяў з боку сілавікоў.
У свае санкцыйныя сьпісы Натальлю Качанаву таксама ўключылі Вялікая Брытанія, Канада, Швайцарыя. Таксама яна знаходзіцца ў адмысловым пераліку прызначаных грамадзянаў і заблякаваных асобаў ЗША.
Праз пэрсанальныя санкцыі і немагчымасьць выезду ў краіны Эўразьвязу кіраўніца Савету Рэспублікі накіравала зварот да ўдзельнікаў саміту. Яна адзначыла, што ў Беларусі за час барацьбы з пандэміяй назапашаны каштоўны досьвед, рэалізуецца комплекс санітарных і мэдычных захадаў дзеля супрацьдзеяньня распаўсюду COVID-інфэкцыі.
У прыватнасьці, пералічыла, што дзейнічае ўласная вытворчасьць сродкаў індывідуальнай засьцярогі, адпрацаваная лягістыка лячэньня і назіраньня за больш лёгкімі пацыентамі дома, створана сыстэма санаторыяў для рэабілітацыі пацыентаў, запушчана вытворчасьць вакцыны «Спутник V» на беларускіх прадпрыемствах.
