Пра гэта паведамляе інфармацыйнае агенцтва Reuters са спасылкай на высокапастаўленага супрацоўніка Белага дому.
Раней прэзыдэнт Джо Байдэн абвяшчаў пра тое, што амэрыканскія вайскоўцы будуць цалкам выведзеныя з Афганістану да 31 жніўня і апэрацыя па эвакуацыі з краіны патэнцыйна дзясяткаў тысяч людзей мусіла завяршыцца да гэтай даты.
Аднак, выступаючы ў нядзелю, Джо Байдэн прызнаў, што гэты «цяжкі і балючы працэс» спалучаны з праблемамі. Амэрыканскія войскі могуць застацца ў Афганістане і пасьля 31 жніўня, сказаў прэзыдэнт Байдэн.
Учора прадстаўнікі талібаў папярэдзілі пра тое, што перанос крайняга тэрміну вываду амэрыканскіх салдат будзе мець нэгатыўныя наступствы. Адначасова Вялікая Брытанія заклікала Белы дом адкласьці вывад войскаў да завяршэньня апэрацыі па эвакуацыі.
Брытанскія, францускія і нямецкія вайскоўцы ўдзельнічаюць у гэтай апэрацыі. Яны ня змогуць яе працягнуць у выпадку вываду амэрыканскага кантынгенту, які налічвае зараз 6 тысяч чалавек. Сёньня кіраўнікі краінаў Вялікай сямёркі праводзяць віртуальную нараду, дзе будзе абмяркоўвацца гэтае пытаньне.
У панядзелак увечары кангрэсмэн Адам Шыф, кіраўнік камітэту Палаты прадстаўнікоў Кангрэсу ЗША ў справах выведкі назваў «вельмі малаімаверным» завяршэньне эвакуацыі цягам васьмі дзён, улічваючы колькасьць амэрыканцаў, якія ўсё яшчэ знаходзяцца ў Афганістане.
