У заяве адзначаецца:
«11 жніўня 2021 года быў затрыманы і зьмешчаны ў ізалятар часовага ўтрыманьня былы амбасадар Беларусі ў Славаччыне Ігар Ляшчэня, які пасьля недэмакратычных выбараў прэзыдэнта ў жніўні 2020 году асудзіў гвалт у дачыненьні да беларускага народу і пратэстоўцаў, а пасьля браў удзел у розных грамадзкіх палітычных ініцыятывах.
Мы ўпэўненыя, што сапраўдным матывам пазбаўленьня волі зьяўляецца яго негвалтоўная дзейнасьць па прасоўваньні дэмакратычных каштоўнасьцяў, а таксама правамерная рэалізацыя свабоды меркаваньняў і іх выказваньня.
На падставе гэтага мы лічым яго перасьлед і зьняволеньне палітычна матываваным, зьвязаным зь негвалтоўнай дзейнасьцю, накіраванай на абарону правоў чалавека і асноўных свабодаў, а яго самога — палітычным зьняволеным у адпаведнасьці з п. 3.1 Кіраўніцтва па вызначэньні паняцьця „палітычны зьняволены“.
Мы патрабуем ад уладаў Беларусі неадкладна вызваліць Ігара Ляшчэню і спыніць яго крымінальны перасьлед, спыніць рэпрэсіі і вызваліць усіх палітычных зьняволеных», — гаворыцца ў супольнай заяве праваабарончых арганізацыяў Беларусі.
