16 жніўня Служба бясьпекі Грузіі заявіла, што падпісанае ў 2016-м годзе пагадненьне аб супрацы з КДБ Беларусі не абавязвае бакі рабіць нешта, што супярэчыць іх дзяржаўным інтарэсам.
У лісьце Ціханоўская нагадала пра «недапушчальнасьць выкарыстаньня дадзенага пагадненьня для выдачы інфармацыі пра грамадзян Беларусі ды іншай супрацы, якая можа нэгатыўна адбіцца на мірных беларускіх грамадзянах, якія знаходзяцца на тэрыторыі Грузіі», — паведамляе афіцыйны тэлеграм-канал Сьвятланы Ціханоўскай.
У лісьце адзначаецца, што рэжым Аляксандра Лукашэнкі выкарыстоўвае спасылкі на «антытэрарыстычнае заканадаўства» для перасьледу сваіх палітычных апанэнтаў. Паводле Ціханоўскай, толькі поўнае спыненьне пагадненьня альбо публічная заява аб замарозцы супрацоўніцтва будуць гарантаваць бясьпеку беларускіх грамадзян у Грузіі, а таксама адпавядалі б нацыянальным інтарэсам Грузіі.