Здымкі апублікавала газэта Daily Mail.
57-гадовы Дэйвід Сьміт быў ахоўнікам амбасады Вялікай Брытаніі ў Нямеччыне. Ён быў арыштаваны напярэдадні, пасьля таго як некалькі месяцаў за ім назіралі брытанская служба контравыведкі MI5 і нямецкія спэцслужбы.
Яго падазраюць у перадачы расейскай выведцы адчувальнай інфармацыі пра контратэрарыстычныя апэрацыі. Пры гэтым доступу да сакрэтных дакумэнтаў ён, хутчэй за ўсё, ня меў. Аднак, карыстаючыся сваёй пасадай, ён мог незаўважна пранікаць у памяшканьні, у якія не павінен быў мець доступу, дапускае сьледзтва.
Сьміт жыў у двухпакаёвай кватэры ў Потсдаме пад Бэрлінам. У ягонай кватэры знайшлі нашыўкі чатырох вайсковых флётаў Расеі, побач з кніжнай шафай стаіць вялікі расейскі сьцяг, сьведчаць здымкі Daily Mail. Яшчэ адзін, меншы, стаіць побач з тэлевізарам. На кніжнай шафе ляжыць бесказырка Чарнаморскага флёту. Яшчэ адна фуражка, памежных войскаў, была павешаная на цацачнага ратвэйлера.
Унутры шафы — нашыўка расфармаванага ўкраінскага атраду міліцэйскага спэцназу «Беркут», мадэль савецкага аўтамабіля і кнігі па псыхалёгіі і самаразьвіцьці на расейскай мове. Некалькі з кніг у шафе Сьміта прысьвечаныя гісторыі Трэцяга райху. Яшчэ адна — раман былога супрацоўніка брытанскай выведкі Джона Ле Карэ «Забойства па-джэнтльмэнску».
- У 2019 годзе былы спэцназавец ЗША Пітэр Дэбінс прызнаўся ў працы на расейскую вайсковую выведку. За выкананьне аднаго са сваіх заданьняў ён атрымаў расейскую вайсковую форму, тысячу даляраў і бутэльку каньяку, расказваў ён. Ён быў асуджаны на 15 гадоў і 8 месяцаў турмы. Пасьля гэтага ён адмовіўся ад прызнальных паказаньняў.
