Лінкі ўнівэрсальнага доступу

Суд дазволіў завочнае расьсьледаваньне супраць Януковіча ў справе аб расстрэлах на Майдане


Віктар Януковіч у лютым 2014 году пасьля расстрэлаў на Майдане

Пячорскі раённы суд Кіева задаволіў хадайніцтва сьледчага Дзяржаўнага бюро расьсьледаваньняў і дазволіў спэцыяльнае завочнае дасудовае расьсьледаваньне адносна былога прэзыдэнта Ўкраіны Віктара Януковіча.

Пра гэта паведамілі ў офісе генэральнага пракурора Ўкраіны.

Дазволенае расьсьледаваньне тычыцца, у прыватнасьці, забойства мітынгоўцаў на Майдане Незалежнасьці і прылеглых да яго вуліцах у лютым 2014 году.

Такое рашэньне суду дае права боку абвінавачаньня на дасудовае расьсьледаваньне адносна падазраванага пры яго адсутнасьці (in absentia).

«Паводле зьвестак сьледзтва, былы кіраўнік дзяржавы, жадаючы спыніць масавыя акцыі пратэсту, якія ставілі пад пагрозу яго знаходжаньне ва ўладзе, выкарыстоўваючы наяўныя паўнамоцтвы прэзыдэнта Ўкраіны, дзейнічаючы ў складзе арганізаванай групы сумесна з былымі кіраўніком СБУ і міністрам унутраных справаў, не пазьней за 18 лютага 2014 году арганізаваў ужываньне супрацоўнікамі праваахоўных органаў без адпаведных падставаў і з парушэньнем нормаў дзейнага заканадаўства спэцыяльных сродкаў, вайсковай тэхнікі, агнястрэльнай зброі для сілавога процідзеяньня і разгону дэманстрантаў. Такія захады прывялі да масавых ахвяраў сярод мітынгоўцаў у цэнтральнай частцы Кіева з 18 па 20 лютага 2014 году, у тым ліку да супрацьпраўнага прычыненьня сьмерці 62 асобам», — гаворыцца ў паведамленьні.

Дасудовае расьсьледаваньне праводзяць сьледчыя Дзяржаўнага бюро расьсьледаваньняў.

У чэрвені Кіеўскі апеляцыйны суд адмовіўся пачынаць апэляцыйнае вядзеньне паводле скаргі адвакатаў экс-прэзыдэнта Ўкраіны Віктара Януковіча. Скарга абароны тычылася пастановы Шаўчэнкаўскага раённага суду аб дазволе на спэцыяльнае дасудовае расьсьледаваньне адносна Януковіча . Яно тычыцца артыкулу пра спробу гвалтоўнай зьмены або зрынаньня канстытуцыйнага ладу ці захопу дзяржаўнай улады.

Экс-прэзыдэнта Віктара Януковіча вінавацяць ва ўзурпацыі ўлады шляхам ціску на Канстытуцыйны суд, які ў 2010 годзе прызнаў неканстытуцыйнаю рэформу Асноўнага закону з 2004 году — яна абмяжоўвала паўнамоцтвы прэзыдэнта і рабіла Ўкраіну парлямэнцка-прэзыдэнцкай рэспублікай.

  • Віктар Януковіч зьехаў з Украіны ў лютым 2014 году пасьля расстрэлаў на Майдане. Цяпер ён хаваецца ў Расеі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG