Лінкі ўнівэрсальнага доступу

Колькасьць перахопленых мігрантаў з боку Беларусі перавысіла 3500 чалавек


Умацаваньне літоўскай мяжы, ілюстрацыйнае фота

За мінулыя суткі літоўскія памежнікі затрымалі 144 мігрантаў з боку Беларусі, вынікае з дадзеных Статыстычнага дэпартамэнта Літвы.

Удакладняецца, што агулам ад пачатку году на беларускім участку мяжы перахоплена 3 545 чалавек — у 40 разоў больш, чым за ўвесь 2020-ы.

Праз рэзкае павелічэньне колькасьці парушальнікаў мяжы ўрад Літвы абвясьціў рэжым надзвычайнай сытуацыі на нацыянальным узроўні. Пачалося ўзьвядзеньне загароды з калючага дроту і плоту.

Сярод затрыманых найбольш грамадзянаў Іраку — 2 299. Затым ідуць прадстаўнікі Конга (191), Камэруну (129), Сырыі (100), а таксама яшчэ дзясятку краінаў.

Кіраўніцтва Літвы неаднаразова абвінавачвала афіцыйны Менск у садзейнічаньні росту нелегальнай міграцыі. Да аховы мяжы прыцягнутыя сілы іншых ведамстваў, войскі, дапамогу аказваюць прадстаўнікі Эўрапейскай службы памежнай і берагавой аховы (Frontex).

Літва таксама папрасіла склікаць пазачарговае пасяджэньне Рады юстыцыі і ўнутраных спраў Эўразьвязу ў сувязі з сытуацыяй на мяжы. У абгрунтаваньні паведамляецца пра неабходнасьць канкрэтнай палітычнай, фінансавай і экспэртнай падтрымкі, каб прадухіліць транзыт нелегалаў у іншыя краіны Эўразьвязу.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG