Менгарвыканкам, які выступіў пазоўнікам, не прывёў ніводнага прыкладу парушэньняў з боку фонду.
«Але ёсьць сакрэтны ліст, зь якім азнаёміцца нельга і пра што яно таксама. Ніяк. Бо грыф „сакрэтна“. Сутнасьць яго мы коратка даведаліся толькі ў выдадзеным праз тры гадзіны пасьля заканчэньня пісьмовым рашэньні. Вы людзі разумныя, здагадаецеся», — напісаў у фэйсбуку дырэктар фонду Аляксандр Скрабоўскі.
Як нагадвае Zеrkalo, Фонд «Добра» — гэта некамэрцыйная арганізацыя, якая працуе ў сфэры разьвіцьця сацыяльных інавацыяў, адказных і ўстойлівых практык вядзеньня бізнэсу. Ён вядомы ў першую чаргу як заснавальнік конкурсу сацыяльных праектаў Social Weekend, а таксама студыі імпакт-праектаў Хаб/ЛАБ.
Social Weekend — найбуйнейшы конкурс сацыяльных праектаў у Беларусі. Ён існуе больш за сем гадоў. На конкурс можна было заявіць арыгінальную ідэю і атрымаць фінансаваньне для яе рэалізацыі.
- Зь сярэдзіны ліпеня ў Беларусі адбываецца масавая ліквідацыя недзяржаўных арганізацыяў. Геаграфія зьліквідаваных уладамі ўстановаў ахапіла практычна ўсю Беларусь. На гэты момант вядома пра 57 арганізацыяў, закрытых несудовым чынам, яшчэ 20 спрабуюць ліквідаваць у судах.
- Пад пагрозай існаваньне дзясяткаў асьветніцкіх, праваабарончых, дабрачынных, спажывецкіх, дасьледчых і іншых арганізацыяў. Прадстаўнікоў установаў затрымліваюць, праводзяць у іх дома і ў офісах ператрусы, арыштоўваюць рахункі.
Тым часам суды разглядаюць пытаньні аб ліквідацыі:
- інфармацыйна-асьветніцкага фонду «Сетка разьвіцьця бізнэсу»;
- мясцовага фонду разьвіцьця «Новая эканамічная стратэгія»;
- грамадзкіх аб’яднаньняў — «Зялёная эканоміка»;
- «Дыярыуш»;
- «Абарона правоў спажыўцоў «Садружнасьць».
