«Наш Цэнтар надзвычайных сытуацый прапануе Міністэрству ўнутраных спраў абвясьціць экстрэмальную сытуацыю на дзяржаўным узроўні», — заявіў журналістам у пятніцу намесьнік камандуючага памежнай службы, палкоўнік Антанас Мантвідас.
Гэта, паводле яго словаў, дасьць магчымасьць уключыць дадатковыя сілы, спрасьціць працэдуры публічных закупак, а мясцовыя ўлады павінны будуць даць памяшканьні для расьсяленьня мігрантаў.
«Калі летась у нас было каля 70 нелегальных мігрантаў, то на сёньняшні дзень іх ужо 800, у 11 разоў больш», — сказаў у пятніцу на прэсавай канфэрэнцыі намесьнік кіраўніка САДМЛ Відас Мачайціс.
«У асноўным гэта грамадзяне Іраку, Ірану, Сырыі, ёсьць і грамадзяне Беларусі», — сказаў прадстаўнік ведамства.
Міністар замежных спраў Літвы Габрыелюс Ландсбергіс назваў сытуацыю напружанай. Паводле яго, Аляксандар Лукашэнка павінен быць пазбаўлены магчымасьці падманным шляхам прыцягваць новых асобаў, якія маюць намер нелегальна трапіць у Эўразьвяз.
Мігранты, як адзначыў кіраўнік літоўскага МЗС, магчыма, і могуць дабрацца да мяжы з дапамогай рэжыму Лукашэнкі, аднак усе, хто незаконна перасек мяжу ЭЗ, павінны быць вернутыя туды, адкуль яны прыбылі.
Афіцыйная Вільня абвінавачвае Беларусь у нядбайнасьці і нават у спрыяньні перапраўцы замежнікаў да мяжы Літвы. Міністарка ўнутраных спраў Літвы Агне Білатайце заявіла, што рост колькасьці мігрантаў — гэта сьвядомая палітыка беларускіх уладаў супраць Літвы. Яна назвала тое, што адбываецца, пачаткам гібрыднай вайны.
Беларускія ўлады мэтанакіравана перакідаюць мігрантаў да мяжы, завабліваючы іх у краіну пакетнымі прапановамі дзяржаўнага турыстычнага агенцтва (напрыклад, рэйс з Багдаду або Стамбулу і даезд да літоўскай мяжы). Такую вэрсію ў інтэрвію Financial Times раней выказаў Габрыелюс Ландсбергіс.
