Прэзыдэнт Расеі Ўладзімір Пуцін падпісаў закон пра забарону расейскім грамадзянам і юрыдычным асобам у хоць якой краіне сьвету браць удзел у працы іншаземных няўрадавых арганізацый, прызнаных у Расеі «непажаданымі».
Закон таксама ўводзіць з 1 кастрычніка кантроль дзяржавы за грашовымі пераводамі хоць якога памеру з пэўных краінаў.
Пералік такіх краінаў яшчэ не апублікаваны.
Закон пра «непажаданыя» арганізацыі Пуцін падпісаў у траўні 2015 году, пасьля гэтага яго некалькі разоў узмацнялі.
«Непажаданай» можа быць прызнаная ўсякая няўрадавая арганізацыя, якая, на думку генэральнага пракурора або ягонага намесьніка, стварае «пагрозу бясьпецы дзяржавы і асновам канстытуцыйнага ладу». Пасьля ўнясеньня ў сьпіс «непажаданых» арганізацыі забараняецца працаваць на тэрыторыі Расеі, замарожваюцца ўсе ейныя рахункі, мусяць быць закрытыя ўсе ейныя аддзяленьні. Супрацоўнічаць з такімі арганізацыямі забаронена. Парушальнікам закону пагражае штраф і зьняволеньне.
