Лінкі ўнівэрсальнага доступу

Bloomberg : ЗША і Нямеччына маюць намер кампэнсаваць Украіне наступствы рэалізацыі праекту «Паўночны паток – 2»


Карабель-трубаўкладчык, які працуе на пабудове газаправоду "Паўночны паток-2", у нямецкім порце Вісмар

Паводле зьвестак агенцтва Bloomberg, ЗША і Нямеччына імкнуцца павялічыць падтрымку Ўкраіны, каб зьмякчыць наступствы завяршэньня газаправоду «Паўночны паток – 2»

Паведамляецца, што дзярждэпартамэнт ЗША і МЗС Нямеччыны разглядаюць пытаньне пагадненьня з шэрагам варыянтаў, перамовы адбываюцца з удзелам дарадцы ў нацыянальнай бясьпецы ЗША Джэйка Салівана і дарадцы ў нацыянальнай бясьпецы канцлера Нямеччыны Ангелы Мэркель Яна Гэкера.

Бакі спадзяюцца дасягнуць дамоўленасьцяў да таго часу, як 15 ліпеня Мэркель наведае Вашынгтон і сустрэнецца з прэзыдэнтам ЗША Джо Байдэнам, паведамляе Bloomberg са спасылкай на некалькі неназваных крыніц, знаёмых з перамовамі. Неўзабаве прэзыдэнта Ўкраіны Ўладзімера Зяленскага таксама запросяць наведаць Вашынгтон.

Адзін з прапанаваных варыянтаў — абавязаньні ЗША і Нямеччыны падтрымаць інфраструктуру Ўкраіны інвэстыцыямі, якія дапамогуць краіне пабудаваць уласныя электрастанцыі.

Вашынгтон і Бэрлін разглядаюць пытаньне кампэнсацыі Ўкраіне платы за транзыт, якую яна страціць, калі запрацуе газаправод «Паўночны паток – 2», прызначаны для транспартаваньня прыроднага газу праз Балтыйскае мора з Расеі ў Нямеччыну.

Расея неаднаразова падкрэсьлівала, што праект паміж «Газпромом» і эўрапейскімі энэргетычнымі гігантамі зьяўляецца выключна эканамічным, і пацьвердзіла, што праект не паўплывае на транзыт газу праз Украіну па існуючых кантрактах.

Нямеччына гатовая да перамоваў з РФ аб павялічэньні квотаў на транзыт для Ўкраіны. Раней падчас сустрэчы зь дзяржсакратаром ЗША Энтоні Блінкенам міністар замежных справаў Нямеччыны Гайка Маас пацьвердзіў пазыцыю Бэрліна аб тым, што пры ўводзе ў эксплюатацыю газаправоду «Паўночны паток – 2» мусіць быць гарантавана, што ён не наробіць шкоды інтарэсам Украіны.

Агенцтва нагадала, што ў сераду ў Бэрліне дзяржсакратар ЗША Энтані Блінкен пацьвердзіў, што абодва бакі гаварылі пра спосабы «гарантыяў таго, што Расея ня зможа выкарыстаць энэргетыку ў якасьці інструмэнту прымусу, накіраванага супраць Украіны ці каго-небудзь яшчэ».

«Мы поўныя рашучасьці паглядзець, ці зможам мы атрымаць нешта станоўчае са складанай сытуацыі, якую мы атрымалі ў спадчыну», — сказаў Блінкен, дадаўшы, што ЗША хочуць «зрабіць усё магчымае, каб пераканацца, што ў канчатковым выніку энэргетычная бясьпека Эўропы будзе не падарваная, а фактычна ўмацаваная». Тое ж самае, паводле яго, тычыцца і Ўкраіны.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG