Лінкі ўнівэрсальнага доступу

Зяленскі заявіў, што амаль год не размаўляў з Лукашэнкам


Аляксандар Лукашэнка і Ўладзімір Зяленскі, кастрычнік 2019 году

Прэзыдэнт Украіны Ўладзімір Зяленскі быў упэўнены, што Аляксандар Лукашэнка выдасьць Кіеву затрыманых у Беларусі вагнэраўцаў, якіх украінскі бок лічыць датычнымі да ваенных злачынстваў у Данбасе. Калі Лукашэнка не зрабіў гэтага, камунікацыя зь ім спынілася, заявіў Зяленскі ў інтэрвію тэлеканалу «1 + 1», перадае БелаПАН.

«Цяпер няма [камунікацыі]. Апошні раз размаўлялі зь ім праз тэлефон, (…) калі вагнэраўцы былі на тэрыторыі Беларусі. Я пазваніў Аляксандру Рыгоравічу. Я сказаў яму, я яго папярэдзіў: я гатовы перадаць вам усю поўную інфармацыю, якая тычыцца тых людзей. Мы ўжо разумелі, якія там прозьвішчы, мы разумелі, хто яны такія», — сказаў Зяленскі

«Ён казаў мне: „Дарагі мой Уладзімір Аляксандравіч, ты ж ведаеш, як я да цябе стаўлюся, ты ж ведаеш, як Беларусь любіць Украіну. Ты ж ведаеш, я цябе не падвяду, усё будзе нармальна. Цяпер у мяне тут ня ўсё, значыць, спакойна, я разьбяруся“. Я быў упэўнены, што ён перадасьць нам гэтых забойцаў, гэтых вагнэраўцаў. Але потым сталася тое, што сталася», — апавёў Зяленскі.

Ён дадаў, што гэта была апошняя ягоная размова з Лукашэнкам.

Паводле яго, Украіна ня мела дачыненьня да гэтай спэцапэрацыі. «Я дакладна разумею, што ідэя гэтай апэрацыі была, скажам так, іншых краінаў, дакладна не Ўкраіны», — сказаў Зяленскі.

Ён правёў паралелі з пасадкай самалёта Ryanair у Менску і сказаў «дзякуй Богу, што мы праявілі пытаньне субʼектнасьці ў гэтым важным пытаньні».

29 ліпеня 2020 году супрацоўнікі праваахоўных органаў Беларусі затрымалі пад Менскам 32 «баевікоў замежнай прыватнай вайсковай кампаніі „Вагнэр“», яшчэ адзін быў затрыманы ў Гомельскай вобласьці.

Спачатку Аляксандар Лукашэнка паабяцаў перадаць Украіне 28 баевікоў, датычных да канфлікту на Данбасе, але пасьля выбараў 9 жніўня ўсіх вярнулі ў Расею.

18 жніўня «Ўкраінская праўда» са спасылкай на крыніцы ў Міністэрстве абароны і Службе бясьпекі Ўкраіны, а таксама на журналіста Юрыя Бутусава напісала, што апэрацыю затрыманьня групы баевікоў ПВК «Вагнэр» рыхтавалі ўкраінскія спэцслужбы, але яна правалілася. Нібыта 24 ліпеня групу мусілі прывезьці з Масквы ў менскі аэрапорт. Не затрымліваючыся ў Беларусі, 25 ліпеня група мела вылецець у Турэччыну рэйсам Менск — Стамбул. Паводле задумы, падчас пералёту самалёт павінен быў тэрмінова сесьці ў адным з украінскіх аэрапортаў, бо аднаму з пасажыраў, ролю якога меўся выконваць агент СБУ, нібыта стала б дрэнна. Пад выглядам мэдыкаў у самалёт зайшла б група спэцназу і затрымала б «вагнэраўцаў». Аднак плян не ўдалося рэалізаваць.

Паводле публікацыі, 24 ліпеня аб фінальнай стадыі апэрацыі далажылі прэзыдэнту Ўкраіны Ўладзіміру Зяленскаму. На дакладзе прысутнічаў кіраўнік Офісу прэзыдэнта Андрэй Ярмак і яшчэ некалькі чалавек. Ярмак прапанаваў адкласьці апэрацыю, каб не сарваць абмен палоннымі, які тады абмяркоўваўся з Расеяй. Зяленскі яго падтрымаў і запатрабаваў перанесьці апэрацыю на 30 ліпеня.

25 ліпеня група ня села на рэйс да Стамбулу, а засялілася ў санаторый з загадам чакаць 30 ліпеня. 29 ліпеня іх затрымалі, а 14 жніўня перадалі Расеі, хоць да гэтага Ўладзімір Зяленскі прасіў Лукашэнку перадаць іх Украіне і Лукашэнка «заявіў пра гатоўнасьць да супрацы». Паводле публікацыі, украінская выведка нібыта лічыць, што гэта адбылося з прычыны «зьліву» інфармацыі ў ФСБ Расеі.

19 жніўня кіраўнік Офісу прэзыдэнта Ўкраіны Андрэй Ярмак назваў публікацыі аб вэрбаваньні наймітаў у Менску ўкраінскімі спэцслужбамі расейскай дэзынфармацыяй. Кіраўнік вайсковай выведкі Ўкраіны Кірыл Буданаў заявіў, што гэта магло быць апэрацыяй расейскіх спэцслужбаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG