Лінкі ўнівэрсальнага доступу

Жыхара Наваградку пакаралі годам «хіміі» за два словы ў інстаграме


Максім Шырынскі

Жыхара Наваградку Максіма Шырынскага асудзілі за тое, што ён нібыта абразіў у інстаграме падпалкоўніка міліцыі Дзьмітрыя Кротава. Той быў на працы, калі пасьля затрыманьня Віктара Бабарыкі пратэстоўцы зладзілі ланцуг салідарнасьці.

Справу разглядала судзьдзя Карэліцкага раёну Ірына Каско, дзяржаўны абвінаваўца — Аляксандар Шляжко. Старшы інспэктар ГУУС Менскага гарвыканкаму Дзьмітры Кротаў праходзіў у справе як пацярпелы.

Асуджанаму Максіму Шырынскаму 33 гады. Жанаты, двое малых дзяцей. Працуе электразваршчыкам на заводзе.

Пацярпеламу Кротаву 39 гадоў, у міліцыі служыць 19 гадоў. Ён сам зьвярнуўся ў міліцыю, каб пакаралі Шырынскага.

Па вэрсіі сьледзтва, Шырынскі ў інстаграме пад фота Кротава яшчэ летась у ліпені пакінуў камэнтар «Е*** мусор». Экспэрты вырашылі, што ён «утрымлівае нэгатыўную ацэнку» і адрасаваны Кротаву. На мужчыну завялі крымінальную справу за абразу па артыкуле 369 КК Беларусі.

Шырынскі сваю віну цалкам не прызнаў. Ён патлумачыў, што камэнтар адрасаваў невядомаму чалавеку, які і запосьціў згаданае фота. Прычым ягоныя словы тычыліся не міліцыянта, а інтэрнэту агулам, дзе могуць разьмяшчаць не заўжды праўдзівую інфармацыю. Шырынскі дадаў, што ня ведаў, што чалавек на фота — супрацоўнік міліцыі, бо той быў у цывільным адзеньні.

Як расказала сястра асуджанага Вольга, допісу з фота міліцыянта і абразьлівым камэнтаром ужо на пачатак сьледзтва не існавала. Доказам віны брата ў судзе быў скрыншот таго допісу.

Са словаў сястры, у судзе таксама разглядалі відэаролік, на якім Шырынскі рве пасьведчаньні да ўзнагародаў падчас ягонай службы ў войску са словамі, што яму сорамна за беларускае войска. Гэта ў судзе прадставілі як характарыстыку Шырынскага, што ён мае непрыязь да супрацоўнікаў органаў унутраных спраў агулам.

Мужчыну пачалі выклікаць на допыты яшчэ ў жніўні. Ён увесь час заставаўся пад падпіскай аб нявыезьдзе. У красавіку справу перадалі ў суд. У чэрвені яго прызналі вінаватым і далі 1 год абмежаваньня волі з накіраваньнем ва ўстанову адкрытага тыпу.

Прысуд ужо ўступіў у сілу. Пакараньне Шырынскі будзе адбываць у Мазыры, куды паедзе 25 чэрвеня.

Што такое «хімія» і «хатняя хімія»

«Хімія» — адбыцьцё пакараньня абмежаваньнем волі ў папраўчай установе адкрытага тыпу. Выраз зьявіўся ў СССР у пасьляваенныя часы, калі працу асуджаных пачалі актыўна выкарыстоўваць на будоўлях і шкодных вытворчасьцях (у тым ліку на хімічных прадпрыемствах). У Беларусі 29 папраўчых установаў адкрытага тыпу, або «хіміяў».

Праз пакараньне «хіміяй» прайшоў шмат хто зь беларускіх апазыцыянэраў.

«Да мяне маглі прыяжджаць наведнікі, мы сустракаліся і размаўлялі ў дворыку спэцкамэндатуры. Карыстаўся мабільным тэлефонам, даходзілі лісты, я пісаў з „хіміі“ нататкі... Некалькі разоў дазвалялі зьезьдзіць да бацькоў», — згадваў Павал Севярынец пра сваю «хімію» ў Пружанскім раёне, дзе працаваў на складзе мясцовай гаспадаркі.

«Хіміяй» часта заканчваюцца адседкі вязьняў, якія былі асуджаныя на вялікія тэрміны зьняволеньня, але праз добрыя паводзіны заслужылі палёгку.

Пакараньне «абмежаваньнем волі» магчыма адбыць і на так званай «хатняй хіміі» — калі ў прысудзе выкарыстоўваецца фармулёўка «без накіраваньня ў папраўчую ўстанову адкрытага тыпу». Фактычна гэта сумесь «хіміі», якая прадугледжвае абавязковую прымусовую працу, і адбыцьця пакараньня з адтэрміноўкай, калі асуджаны знаходзіцца дома, але пад рэгулярным пільным кантролем міліцыі.

10 відаў няволі: гід па беларускіх турмах

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG