Лінкі ўнівэрсальнага доступу

У «польскай школе» Горадні адкрыюць беларускамоўную клясу


Польская школа ў Горадні

У сярэдняй школе № 36 Горадні з польскай мовай навучаньня набяруць беларускамоўныя першыя клясы, піша газэта «Гродненская правда».

Большасьць прадметаў для першаклясьнікаў гэтай школы будуць выкладаць па-беларуску. Польская мова застанецца для «паглыбленага вывучэньня».

Такое новаўвядзеньне ў школе зробяць «на тле непрыязных крокаў суседніх дзяржаваў».

«Захоўваючы вывучэньне мовы, літаратуры, гісторыі і культуры польскага народу, у далейшым мы будзем плянамерна пераходзіць да вывучэньня іншых прадметаў у сярэдняй школе № 36 на дзяржаўных мовах», — адзначылі ў Горадзенскім гарвыканкаме.

Зьменаў у навучаньні для ўсіх іншых клясаў не плянуюць. Большасьць прадметаў «польскай школы» у Горадні раней выкладалі па-польску.

Моўнае пытаньне ў польскай школе падымалася раней. У красавіку 2017 бацькі змагаліся супраць русыфікацыі школы. У 2014 годзе мову навучаньня абмяркоўвалі празь меркаваныя зьмены ў Кодэксе аб адукацыі, у 2012 — калі ў школе першы раз прапанавалі ствараць рускамоўныя клясы, паведамляе Hrodna.life.

Існуе польска-беларуская дамоўленасьць, паводле якой гэтая школа, пабудаваная за польскія грошы, павінна выкарыстоўвацца толькі для навучаньня на польскай мове.

У Горадні дасюль няма ніводнай школы з вывучэньнем прадметаў на беларускай мове, а беларускамоўных клясаў адзінкі.

Усяго ў 2021 годзе ў Горадні плянуюць адкрыць 209 першых клясаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG