11 чэрвеня прайшла нарада аб праекце новага Грамадзянскага кодэксу Беларусі. Існуючы кодэкс не пераглядаўся больш за 20 гадоў. Некалькі апошніх год ва ўрадзе працавалі над зьменамі, якія закранаюць многія сфэры — да працоўнай і банкаўскай.
Міністар юстыцыі Алег Сьліжэўскі па выніках нарады расказаў пра некаторыя зьмены ў Грамадзянскім кодэксе:
- У прыватнасьці, прапануецца замацаваць, што асобныя віды юрыдычных асобаў змогуць дзейнічаць на падставе зацьверджанага ўрадам тыпавога статуту. Калі цяпер для рэгістрацыі суб’екта гаспадараньня неабходна распрацаваць уласны статут, прадставіць яго ў орган рэгістрацыі і іншыя дзяржаўныя структуры, то па жаданьні заснавальнікаў можна не рыхтаваць індывідуальны статут і пры рэгістрацыі скарыстацца тыпавым варыянтам.
- У кодэксе таксама будзе замацавана норма працы ў Беларусі замежных арганізацый: іх камэрцыйная дзейнасьць можа весьціся толькі са стварэньнем філіялаў.
- Прадпрымальніцкая дзейнасьць з дапамогай прадстаўніцтваў замежных арганізацый ажыцьцяўляцца ня можа.
- Яшчэ адна навацыя — артыкул аб дадатковай ахове выявы грамадзяніна. Гэта значыць фатаграфіі людзей ня могуць распаўсюджвацца бязь іх згоды, за выключэньнем пэўных выпадкаў — напрыклад, калі фота зроблена ў грамадзкім месцы.
- Зьмены будуць тычыцца таксама зьдзелак зь непаўналетнімі грамадзянамі ва ўзросце ад 14 да 18 гадоў. На гэты момант няма адназначнага разуменьня: на практыцы такія зьдзелкі могуць ажыцьцяўляцца са згоды абодвух законных прадстаўнiкоў альбо дастаткова аднаго? Замацоўваецца, што дастаткова аднаго законнага прадстаўніка.
- У праекце прыбралі верхнюю мяжу тэрміну дзеяньня даверанасьці (цяпер тры гады). Бакі змогуць самі вызначаць патрэбны тэрмін. Калі ён не паказваецца, то паводле змаўчаньня будзе разумецца гадавы адрэзак.
- Зьявіцца і безадкліканая даверанасьць: выдадзены дакумэнт ня можа быць адкліканы да свайго заканчэньня, калі іншае не прадугледжана ў самой даверанасьці.
Як перадае БелТА, найбольшы блок зьменаў закране гаспадарчую дзейнасьць і звычайных грамадзян.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў