Трохдзённы саміт, які пачынаецца 11 чэрвеня, пройдзе ў Карбіс-Бэй, папулярным турыстычным курорце Корнўалу.
Як паведамляе «Голас Амэрыкі», Вялікая Брытанія задзейнічала больш за 6 500 паліцыянтаў, каб гарантаваць бясьпеку лідэрам ЗША, Францыі, Нямеччыны, Італіі, Японіі і Канады. Аўстралія, Індыя, Паўднёвая Карэя і Паўднёвая Афрыка запрошаны ў якасьці гасьцей саміту.
Саміт зьяўляецца часткай першай афіцыйнай замежнай паездкі прэзыдэнта ЗША Джо Байдэна ў якасьці кіраўніка дзяржавы. Перад вылетам у Вялікую Брытанію журналісты спыталі Байдэна пра яго прыярытэты ў гэтай паездцы.
«Умацаваньне альянсу. Даць зразумець Пуціну і Кітаю, што Эўропа і Злучаныя Штаты па-ранейшаму блізкія, а „Вялікая сямёрка“ будзе дзейнічаць», — сказаў Байдэн.
Прэм’ер-міністар Вялікай Брытаніі Борыс Джонсан сказаў, што зь нецярпеньнем чакае асабістай сустрэчы з саюзьнікамі.
«На саміце „Вялікай сямёркі“ адна з нашых задач — заключыць новую дамову з нагоды пандэміі, — сказаў Джонсан. — Мы паглядзім на тое, што адбываецца тут, у Корнўале, з усімі „зялёнымі“ тэхналёгіямі, а таксама пагаворым пра агульныя каштоўнасьці і пра ўсё, што мы хочам зрабіць разам. Парадак дня вельмі шырокі».
Некалькі лідэраў G7 проста з Корнўалу ў панядзелак адправяцца ў Брусэль на саміт NATO. Затым Байдэн сустрэнецца зь лідэрамі Эўразьвязу ў аўторак.
Паводле аналітыкаў, адзначае «Голас Амэрыкі», шэраг мерапрыемстваў у праграме эўрапейскага турнэ амэрыканскага прэзыдэнта заклікана падкрэсьліць падтрымку саюзьнікаў напярэдадні сустрэчы Джо Байдэна з Уладзімірам Пуціным, якая адбудзецца ў сераду ў Жэнэве.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў