Пра гэта Свабодзе паведаміў старшыня партыі Ігар Барысаў.
Як сказана ў дакумэнце ведамства, падставай паслужылі разьмешчаныя ў партыйным часопісе «Пазыцыя» «абразлівыя выявы дзяржаўнага сьцяга і дзяржаўнага герба Рэспублікі Беларусь, што сьведчыць аб яўнай непавазе БСДП да дзяржаўных сымбаляў, а таксама прапагандуюць нэгатыўнае стаўленьне да іх, што зьяўляецца парушэньнем патрабаваньняў закону «Аб дзяржаўных сымбалях Рэспублікі Беларусь».
Да 11 чэрвеня кіраўніцтву БСДП (Грамада) неабходна прыняць «комплекс захадаў» дзеля ліквідацыі вышэйзгаданых парушэньняў заканадаўства і свайго статуту, пра што праінфармаваць Міністэрства юстыцыі.
Як удакладніў старшыня партыі Ігар Барысаў, прычынай разьбіральніцтва сталі працы вядомага беларускага дызайнэра Ўладзімера Цэсьлера, зьмешчаныя ў апошнім нумары часопіса «Пазыцыя» на сайце БСДП (Грамада).
