Увечары 5 чэрвеня ў рэстаране «Пралеска» ў Асіповічах адбылася бойка. Адзін з удзельнікаў бойкі атрымаў сур’ёзныя траўмы і памёр. Людзі, якія бачылі відэазапіс канфлікту, кажуць, што нібыта апазналі яго ўдзельнікаў, піша Tut.by.
Загінуў у бойцы вайсковы камісар Рэчыцкага і Лоеўскага раёнаў Сяргей Плескі. Гэта пацьвердзілі некалькі яго знаёмых. Паводле інфармацыі парталу Рэчыца LIVE, 38-гадовы палкоўнік у Асіповічах быў у выправе на вучэньнях. У суботу Плескі разам з калегамі пайшоў у рэстаран.
Чытач, які часткова бачыў, што адбылося, расказаў журналістам, што ў рэстаране сядзелі дзьве кампаніі. Паміж імі адбыўся канфлікт зь невядомай прычыны. Калі здавалася, што канфлікт скончыўся, мужчыны выйшлі на вуліцу, і там усё ж завязалася бойка. Адзін з удзельнікаў ад удару зваліўся зь лесьвіцы і ўдарыўся аб плітку. Прыехала «хутка»я, пацярпелага шпіталізавалі, але ён памёр.
Яшчэ адзін чытач, які бачыў запіс зь відэакамэраў рэстарану, сказаў, што адзін з мужчын ударыў Плескага нагой у галаву, удар быў адзін.
Жыхары Асіповічаў, зь якімі ўдалося пагутарыць, кажуць, што апазналі таго, хто ўдарыў палкоўніка. Паводле іх, вінаватага завуць Уладзіслаў, ён, імаверна, працуе ў АМАПе. Сам з Асіповічаў, і раней ён ужо біўся якраз у гэтым рэстаране. Цяпер канфлікт адбыўся празь дзяўчыну.
Апэратыўна зьвязацца са сваякамі загінулага не ўдалося, ня выйшаў на сувязь і супрацоўнік АМАПу, пра якога расказалі людзі.
Сьледчы камітэт завёў крымінальную справу па факце гібелі Сяргея Плескага па ч.3 арт.147 (прычыненьне цяжкіх цялесных пашкоджаньняў, якія прывялі да сьмерці). Таксама там пацьвердзілі, што ў камісара быў канфлікт з раней не знаёмым 25-гадовым менчуком, які служыць у органах унутраных спраў. Зараз вырашаецца, якой будзе мера стрыманьня да амапаўца.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў