«Мяркую, што Аляксандар Лукашэнка не зьяўляецца годным званьня ганаровага доктара КНУ імя Тараса Шаўчэнкі, а ягоныя супрацьзаконныя дзеяньні супярэчаць каштоўнасьцям нашага ўнівэрсытэту. Менавіта таму я зьвяртаюся да навуковай рады КНУ з заклікам тэрмінова разгледзець пытаньне пазбаўленьня Лукашэнкі ганаровага статусу на сваім пасяджэньні», — напісаў Уладзімір Бугроў на сваёй старонцы ў Facebook.
Уладзімір Бугроў прызначаны сёлета рэктарам Кіеўскага ўнівэрсытэту. Ён перамог на выбарах іншых кандыдатаў на гэтую пасаду.
Новы рэктар КНУ дадаў, што глыбока ўражаны і занепакоены падзеямі, якія адбываюцца ў Беларусі, асабліва «нядаўнім нападам на самалёт, які ў Эўропе ўжо назвалі „актам пірацтва з боку беларускай улады“ на чале з самаабвешчаным прэзыдэнтам Беларусі Аляксандрам Лукашэнкам».
Аляксандру Лукашэнку 2 лістапада 2009 году было прысвоена званьне ганаровага доктара Кіеўскага нацыянальнага ўнівэрсытэту імя Тараса Шаўчэнкі.
Дыплём, мантыю і ганаровы знак кіраўніку Беларусі ўручыў рэктар унівэрсытэту акадэмік Леанід Губерскі 5 лістапада 2009 году — у часе візыту Лукашэнкі ў Кіеў. Сёлета Леанід Губерскі ня ўдзельнічаў у выбарах рэктара.
- На сёньняшні дзень званьне ганаровага доктара Кіеўскага нацыянальнага ўнівэрсытэту імя Тараса Шаўчэнкі маюць 99 асобаў, у тым ліку колішнія кіраўнікі Казахстану, Грузіі, Таджыкістану, Азэрбайджану, Узбэкістану і шэрагу эўрапейскіх краін.
