Прысуд за тэкст з абразамі на адрас Лукашэнкі
У Пружанах 53-гадовую Людмілу Кузьняцову асудзілі на год пазбаўленьня волі за «абразу Лукашэнкі» паводле ч. 1 арт. 368 Крымінальнага кодэксу. Жанчыну арыштавалі ў залі суду, а ў яе дома засталіся каля 80 жывёлаў. Прысуд вынес судзьдзя Вадзім Мазоль, піша Праваабарончы цэнтар «Вясна».
Паводле абвінавачаньня, жанчына 12 жніўня 2020 разьмясьціла са старонкі мужа ў сацыяльнай сетцы «ВКонтакте» доўгае паведамленьне з выказваньнямі ў адрас Лукашэнкі.
Людміла на судзе казала, што паведамленьне разьмясьціла публічна «памылкова», друкавала яна яго «для сябе». Пісала тэкст яна на эмоцыях ад падзей у краіне.
Суд над тэхнічнымі супрацоўнікамі «Белсата»
24 траўня судзяць затрыманых тэхнічных работнікаў каналу. Двое зь іх — Павал Патапаў і Рыгор Пятровіч атрымалі па 15 сутак за «непадпарадкаваньне міліцыі», паведамляе БАЖ.
