Лінкі ўнівэрсальнага доступу

У Берасьці судзяць 13 новых фігурантаў «карагоднай справы»


«Карагодная справа», акцыя пратэсту ў Берасьці, 13 верасьня 2020 году.
«Карагодная справа», акцыя пратэсту ў Берасьці, 13 верасьня 2020 году.

Усяго асудзілі ўжо 32 асобы, траіх зь іх адправілі ў калёнію.

24 траўня ў судзе Маскоўскага раёну Берасьця пачаўся працэс над чарговымі фігурантамі «карагоднай справы».

13 асобаў абвінавачваюць паводле ч. 1 артыкулу 342 за ўдзелу 13 верасьня ў карагодзе на скрыжаваньні бульвару Касманаўтаў і праспэкту Машэрава. У той дзень для разгону пратэстоўцаў сілавікі ўжылі вадамёт.

Справу разглядае судзьдзя Яўген Брэган (30 красавіка ён прысудзіў 14 фігурантам «пінскай справы» ад 5,5 да 6,5 года пазбаўленьня волі. — Свабода).

На лаве падсудных 13 чалавек:

  • Ігар Вінакураў,
  • Сяргей Ксянжук,
  • Дзьмітры Курганаў,
  • Алена Лойка,
  • палітвязень Радзівон Медушэўскі (знаходзіцца ў Берасьцейскім СІЗА № 7),
  • Соф'я Нішт,
  • Андрэй Нямірскі,
  • Андрэй Аніскевіч,
  • Ільля Палхоўскі,
  • Кацярына Смірнова,
  • Мікіта Увараў,
  • Аляксандар Храпко,
  • Галіна Чугунова.

У чым абвінавачваюць падсудных?

Усіх іх абвінавачваюць паводле ч. 1 артыкулу 342 Крымінальнага кодэксу («Падрыхтоўка да парушэньня грамадзкага парадку»). Санкцыя ў гэтым выпадку прадугледжвае штраф, або арышт, ці абмежаваньне або пазбаўленьне волі на тэрмін да трох гадоў.

Згодна з вэрсіяй абвінавачаньня, падсудныя ў групе зь іншымі асобамі наўмысна ўзялі актыўны ўдзел у групавых дзеяньнях, якія груба парушаюць грамадзкі парадак. Іх дзеяньні нібыта былі спалучаныя зь непадпарадкаваньнем законным патрабаваньням прадстаўнікоў улады, пацягнулі за сабой парушэньне працы транспарту, арганізацый і прадпрыемстваў.

У прыватнасьці, з прычыны прастою тралейбуснаму парку была нанесеная шкода 619 рублёў 55 капеек, аўтобуснаму — 40 рублёў 37 капеек, на некалькі гадзін зачыніліся гандлёвыя павільёны і рэстаран хуткага харчаваньня. Пацярпелым бокам у справе выступаюць тралейбусны і аўтобусны паркі.

У Берасьці ў «справе карагоду» раней адбыліся ўжо 3 суды. Суд над чацьвёртай часткай фігурантаў працягваецца да гэтага моманту. Агулам асудзілі ўжо 32 асобы, траіх зь іх адправілі ў калёнію.

Справа аб карагодзе — адна з самых масавых палітычных справаў у Беларусі. Колькасьць абвінавачаных у ёй на гэты момант складае больш за 70 чалавек. Аднак сілавікі да сёньня працягваюць займацца пошукам удзельнікаў тых падзеяў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG