Яе маці Аляксандра Чарняўская падала заяву ў КДБ: просіць паведаміць, ці затрымалі яе дачку.
Паводле закону, у выпадку затрыманьня чалавека ягоных блізкіх мусяць праінфармаваць цягам 12 гадзін, паведамляе Tut.by. Паралельна Аляксандра Чарняўская просіць ініцыяваць вышук Юліі як зьніклай, у выпадку, калі яна не затрыманая.
Сваякі плянуюць таксама падаць заяву ў міліцыю, каб там зрабілі захады для вышуку, паколькі ёсьць падставы меркаваць, што чалавек прапаў.
Адвакатка Юліі Чарняўскай накіравала апавяшчэньне ва ўсе сьледчыя органы аб неабходнасьці забясьпечыць магчымасьць зносінаў з падабароннай.
Юлія Чарняўская перастала выходзіць на сувязь з блізкімі раніцай 18 траўня, у дзень ператрусаў у офісе Tut.by і затрыманьня топ-мэнэджараў і супрацоўнікаў кампаніі.
У той жа дзень яе бачылі ў кардыялягічным аддзяленьні 1-й лякарні ў Менску. Яна перанесла гіпэртанічны крыз, мэдыкі аказалі ёй дапамогу. Увесь гэты час побач знаходзіўся апэратыўнік. Пазьней у прыёмным пакоі адказалі, што Юлію Чарняўскую адпусцілі дадому, аднак туды яна не вярнулася.
Яе дачка Яўгенія не выключала, што маці знаходзіцца ў СІЗА КДБ, але адвакату адмовіліся даць хоць якую інфармацыю.