«Кампанія ўжо працуе ў штатным рэжыме. Усё на сваіх месцах, акрамя генэральнага дырэктара», — паведамілі агенцтву «Інтэрфакс-Захад» у Hoster.by.
Генэральны дырэктар Сяргей Павалішаў са сваім адвакатам на гэты момант знаходзіцца ў Дэпартамэнце фінансавых расьсьледаваньняў. Па дадзеных кампаніі, ніякіх абвінавачаньняў яму не прад’яўлялі.
18 траўня раніцай у офісы Tut.by і Hoster.by прыйшлі супрацоўнікі ДФР. Камітэт дзяржаўнага кантролю распачаў у дачыненьні службовых асоб ТАА «Тут Бай Мэдыя» крымінальную справу па ч. 2 арт. 243 КК Рэспублікі Беларусь «Ухіленьне ад выплаты сум падаткаў, збораў у асабліва буйным памеры».
Міністэрства інфармацыі Беларусі абмежавала доступ да інтэрнэт-рэсурсу. У ведамстве патлумачылі, што Генэральная пракуратура ўстанавіла шматлікія факты парушэньняў закону аб СМІ ў частцы разьмяшчэньня забароненай інфармацыі ў шэрагу публікацый. Падчас вобшукаў у рэдактараў і журналістаў сайту канфіскоўвалі тэхніку.
