Высылка можа быць зьвязаная з тым, што спэцслужбы краіны палічылі яго пагрозай сувэрэнітэту дзяржавы. Пра гэта паведамляе сайт МКД.мк.
Паводле інфармацыі выданьня, гэта першы выпадак, калі расейскага дыплямата высылаюць з краіны на патрабаваньне спэцслужбаў. У 2018 годзе Скоп'е ўжо абвяшчала супрацоўніка расейскай дыпляматычнай місіі непажаданай пэрсонай, але тады гэта было зроблена з салідарнасьці зь Вялікай Брытаніяй і ЗША пасьля сытуацыі з замахам на былога расейскага выведніка Сяргея Скрыпаля ў брытанскім Солсбэры.
Імя і ранг высланага дыплямата македонскае выданьне не называе. Расейскія дзяржаўныя агенцтвы паведамляюць, што Масква разглядае меры ў адказ. Звычайна ў такіх выпадках гаворка ідзе пра сымэтрычную высылку — македонскага дыплямата маюць абвясьціць непажаданай асобай у Расеі.
Інцыдэнт у Македоніі адбыўся на фоне масавай высылкі расейскіх дыпляматаў эўрапейскімі краінамі пасьля шпіёнскага скандалу ў Чэхіі. У сакавіку пра раскрыцьцё шпіёнскай сеткі, якая працавала на Расею, абвясьціла Баўгарыя, якая суседнічае з Паўночнай Македоніяй.
