Лінкі ўнівэрсальнага доступу

Кіеў дапусьціў магчымасьць абмену кума Пуціна з Расеяй


Віктар Медзьвядчук лічыўся адным з найбольш уплывовых людзей Украіны ў пачатку 2000-х

Сакратар Рады нацыянальнай бясьпекі Ўкраіны Аляксей Данілаў дапусьціў магчымасьць абмену ў Расею народнага дэпутата Віктара Медзьведчука, адпраўленага пад хатні арышт у справе аб дзяржаўнай здрадзе.

Пра гэта Данілаў паведаміў у эфіры праграмы «Свабода слова Савіка Шустэра».

Ён адказваў на пытаньне, ці магчымы абмен Медзьведчука і іншых сябраў яго партыі ў Расею пасьля іх асуджэньня на ўкраінцаў, якія ўтрымліваюцца пад вартай у Расеі. «Гэтае рашэньне прымае прэзыдэнт Украіны. Я думаю, што калі будзе такая магчымасьць, то мы ахвотна гэта зробім», — адказаў чыноўнік, адзначыўшы, што судовага рашэньня ў справе Медзьведчука яшчэ не было.

Медзьвядчук — лідэр партыі «Апазыцыйная плятформа — За жыцьцё», яна кантралюе найбуйнейшую апазыцыйную фракцыю ў Вярхоўнай Радзе. Апанэнты абвінавачваюць партыю ў прарасейскіх настроях, што лічыцца імі недапушчальным пасьля анэксіі Расеяй Крыму і падтрымкі Масквой сэпаратыстаў на ўсходзе Ўкраіны.

Медзьвядчук падазраецца ў дзяржаўнай здрадзе, спробе разрабаваньня нацыянальных рэсурсаў і парушэньні правілаў вядзеньня вайны. Яму пагражае да 15 гадоў пазбаўленьня волі. 66-гадовы дэпутат узначальваў Адміністрацыю прэзыдэнта Ўкраіны падчас другога тэрміну прэзыдэнцтва Леаніда Кучмы ў пачатку двухтысячных гадоў, двойчы быў намесьнікам старшыні Вярхоўнай Рады, а ў траўні заняў 12 месца ў рэйтынгу самых багатых украінцаў паводле вэрсіі часопіса Forbes з ацэнкай багацьця ў 620 мільёнаў даляраў.

Медзьвядчук — кум расейскага прэзыдэнта Ўладзіміра Пуціна. Той у 2004 годзе выступіў хросным бацькам малодшай дачкі ўкраінскага палітыка Дар’і.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG