Лінкі ўнівэрсальнага доступу

Ціханоўская сустрэлася з кіраўніком МЗС Грэцыі і прэм’ер-міністрам Паўночнай Македоніі


Сьвятлана Ціханоўская

У заключны дзень трохдзённага візыту ў Атэны 14 траўня беларуская дэмакратычная лідэрка Сьвятлана Ціханоўская правяла сустрэчы зь міністрам замежных справаў Грэцыі Нікасам Дэндыясам і прэмʼер-міністрам Паўночнай Македоніі Зоранам Заевым.

У часе сустрэчы з Дэндыясам палітык падзякавала грэцкаму боку за «непрызнаньне Лукашэнкі і адмову ўручыць яму даверчыя граматы», паведамляе яе прэс-служба.

«Міністар запэўніў мяне, што ўсе краіны ЭЗ падтрымліваюць беларусаў у нашай барацьбе, не прызнаюць Лукашэнку прэзыдэнтам. І што пытаньне санкцый і Ўсеабдымнага пляну дапамогі будзе вырашана неўзабаве. Мы рады, што ў нас такія саюзьнікі. І будзем працягваць мабілізаваць палітычную падтрымку ня толькі Эўропы, але і ўсяго сьвету», — заявіла экс-кандыдатка ў прэзыдэнты.

Таксама Ціханоўскую прыняў былы прэмʼер-міністар Грэцыі Георгіяс Папандрэў. «У Папандрэў беларускія карані, яго прадзед Зыгмунт Мінейка быў удзельнікам паўстаньня Каліноўскага 1863 году», — адзначылі ў прэс-службе.

Сустрэча з кіраўніком ураду Паўночнай Македоніі стала першым кантактам Ціханоўскай з уладамі гэтай краіны. Яна падзякавала Зорану Заеву за «ўвядзеньне санкцый супраць рэжыму Лукашэнкі і актыўную падтрымку грамадзянскай супольнасьці Беларусі».

Акрамя таго, у пятніцу палітык выступіла на Дэльфійскім эканамічным форуме і заклікала міжнародную супольнасьць правесьці канфэрэнцыю высокага ўзроўню аб Беларусі, а таксама дапамагчы прыцягнуць да адказнасьці ўсіх вінаватых у парушэньні правоў чалавека ў краіне, «спыніць гвалт і трымаць Беларусь у міжнародным парадку дня».

Таксама Ціханоўская ўсклала кветкі да мэмарыялу студэнтам, якія ў 1973 годзе адкрыта выступілі супраць улады хунты «чорных палкоўнікаў» у Грэцыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG