Лінкі ўнівэрсальнага доступу

Пашыньян зьвярнуўся да Пуціна па вайсковую дапамогу


Студзень 2021 году. Уладзімір Пуцін і Нікол Пашыньян.
Студзень 2021 году. Уладзімір Пуцін і Нікол Пашыньян.

Выканаўца абавязкаў прэм’ер-міністра Армэніі Нікол Пашыньян зьвярнуўся да прэзыдэнта Расеі Уладзіміра Пуціна з просьбай аказаць дапамогу ў адпаведнасьці з армяна-расейскай дамовай, у тым ліку вайсковую.

Пра гэта піша армянская служба Радыё Свабода са спасылкай на віцэ-сьпікера армянскага парлямэнту, прадстаўніка партыі «Грамадзянская дамова» Алена Сіманьяна.

«Інфармацыя ў прэсе, што гэтае пытаньне не абмяркоўвалася, тычыцца ўчорашняй тэлефоннай размовы аб тым, што азэрбайджанскія войскі адыдуць цягам ночы, але паколькі гэтага не адбылося, сёньня раніцай ужо афіцыйна зьвярнуліся да Расейскай Фэдэрацыі», — дадаў ён.

Урад пакуль не распаўсюдзіў афіцыйнага паведамленьня пра гэта. Раней Пашыньян абвінаваціў азэрбайджанскіх вайскоўцаў у пераходзе дзяржаўнай мяжы на поўдні краіны, назваўшы іх дзеяньні замахам на сувэрэнную тэрыторыю.

Азэрбайджан раней заяўляў, што лічыць недапушчальнымі «спробы Ерэвану выкарыстоўваць сытуацыю ў Сюніцкай вобласьці ў палітычных мэтах». Пра гэта гаворыцца ў заяве МЗС Азэрбайджану. Падобныя выпадкі «могуць і павінны вырашацца шляхам узаемных кантактаў паміж вайскоўцамі з абодвух бакоў», падкрэсьліваюць у ведамстве. Азэрбайджан заявіў аб схільнасьці спыніць напружанасьць у рэгіёне і заклікаў рабіць крокі для гэтага.

  • Тэрытарыяльная спрэчка паміж Армэніяй і Азэрбайджанам вакол Нагорнага Карабаху доўжыцца з канца 1980-х гадоў. Населеная пераважна этнічнымі армянамі Нагорна-Карабаская аўтаномная вобласьць пры падтрымцы Армэніі заявіла аб выхадзе з Азэрбайджанскай ССР, а ў верасьні 1991 году абвясьціла аб стварэньні «Нагорна-Карабаскай рэспублікі».
  • Падчас узброенага канфлікту 1988–1994 гадоў у сэпаратысцкім рэгіёне загінулі 30 тысяч чалавек. Нагорны Карабах і некалькі прылеглых да яго раёнаў Азэрбайджану перайшлі пад фактычны кантроль узброеных сілаў Армэніі. У выніку сотні тысяч чалавек, пераважна этнічныя азэрбайджанцы, сталі ўцекачамі і змушанымі перасяленцамі.
  • «Нагорна-Карабаская рэспубліка» афіцыйна не прызнаная ніводнай зь дзяржаваў ААН, у тым ліку Армэніяй. У 1993 годзе ААН прыняла чатыры рэзалюцыі з патрабаваньнямі вываду армянскіх войскаў з Карабаху і прызнаньнем тэрыторыі часткай Азэрбайджану.
  • Пасьля чарговага абвастрэньня сытуацыі ў канцы верасьня 2020 году Азэрбайджан вярнуў пад свой кантроль раёны вакол Нагорнага Карабаху і ўзяў старажытны і сымбалічна істотны горад Шуша (па-армянску Шушы). Назаўтра пасьля ўзяцьця Шушы прэмʼер-міністар Армэніі Нікол Пашыньян, прэзыдэнт Азэрбайджану Ільхам Аліеў і прэзыдэнт Расеі Ўладзімір Пуцін падпісалі мірнае пагадненьне аб спыненьні вайны ў рэгіёне.
  • Паводле дамовы за Армэніяй і Азэрбайджанам замацаваныя тэрыторыі, на якіх знаходзіліся войскі на момант падпісаньня дакумэнту. Уздоўж лініі дотыку разьмешчана міратворчая місія Расеі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG