Праект рэалізуецца ў рамках партнэрства гарадоў-арганізатараў Кракава, Гданьску і Варшавы, а таксама Асацыяцыі літаратурнай уніі і Асацыяцыі перакладчыкаў літаратуры. Гэтае супрацоўніцтва прывядзе ня толькі да творчага побыту ў трох гарадах-гаспадарах, а і да стварэньня сумеснага вэб-сайту, які прасоўвае ідэю літаратурных рэзыдэнцый.
Як паведамляе Беларускі ПЭН-Цэнтар, першая літаратурная рэзыдэнцкая праграма для літаратараў стартуе ў Варшаве.
«Запрашаем гасьцей зь Беларусі, Украіны і Расеі правесьці некалькі творчых тыдняў у цэнтры Варшавы, пад гасьцінным дахам Старамесцкага дому культуры. Абвяшчаем два наборы, зь якіх запросім прынамсі пяць рэзыдэнтаў на побыт ад 2 да 6 тыдняў. Арганізоўваючы рэзыдэнцыі, мы хочам уключыць замежных пісьменьнікаў і перакладчыкаў у варшаўскі літаратурны сьвет. Рэзыдэнты будуць забясьпечаныя кватэрай у цэнтры з утульным месцам для творчай працы, стыпэндыяй у памеры 840 злотых на тыдзень, а таксама мастацкай, лягістычнай і матэрыяльна-тэхнічнай падтрымкай», — падаецца інфармацыя ад арганізатараў.
Набор прызначаны для асобаў, якія адпавядаюць наступным крытэрам:
- маюць кнігу, зборнік паэзіі альбо пераклад, выдадзеныя ў друку
- здольныя гаварыць ангельскай ці польскай мовамі
- у гэты момант працуюць над літаратурным праектам.
Набор № 1:
Апошні тэрмін падачы заявак — 7 траўня.
Час побыту — травень -чэрвень.
Набор № 2:
Апошні тэрмін падачы заявак — 30 чэрвеня.
Час побыту: ліпень-сьнежань.
Заяўка мае зьмяшчаць:
- запоўненую форму
- рэзумэ са сьпісам апублікаваных літаратурных твораў
- суправаджальны ліст з апісаньнем канцэпцыі творчай працы на час побыту (ня болей за 5000 знакаў з прабеламі)
- фрагмэнт апублікаванай працы (максымум 10 старонак А4).
Як спампаваць заяўку і куды яе накіроўваць — па спасылцы.