Урад абавязаў дзяржаўныя кампаніі купляць прадукцыю выключна «Белшыны» і «Лякафарбы», якія трапілі пад санкцыі ЗША

06 травень 2021, 11:22

Вытворчасьць на «Белшыне», архіўнае фота

Савет Міністраў Беларусі падтрымаў некаторыя прадпрыемствы канцэрну «Белнафтахім», якія трапілі пад амэрыканскія санкцыі.

У адпаведнасьці з урадавай пастановай № 261, усе дзяржаўныя арганізацыі, якія маюць такую патрэбу, абавязаны набываць аўтамабільныя пакрышкі толькі аднаго вытворцы — бабруйскай «Белшыны». Тое ж тычыцца і набыцьця ляку і фарбаў: іх можна купляць выключна на лідзкай «Лякафарбе».

ГЛЯДЗІЦЕ ТАКСАМА:

Як на «Белшыне» рэагавалі на амэрыканскія санкцыі. Спыталі ў супрацоўнікаў

За сыстэмныя парушэньні правоў чалавека ў Беларусі абодва прадпрыемствы трапілі пад эканамічныя санкцыі ЗША, як і бальшыня падразьдзяленьняў дзяржаўнага канцэрну «Белнафтахім».

Паводле афіцыйнай статыстыкі, і «Белшына», і «Лякафарба» адносяцца да стратных прадпрыемстваў і выжываюць дзякуючы дзяржаўным датацыям.

Што варта ведаць пра санкцыі ЗША

Першыя санкцыі, якія ўвяла адміністрацыя прэзыдэнта Джорджа Буша пасьля прэзыдэнцкіх выбараў у Беларусі ў 2006 годзе, прадугледжвалі блякаваньне ўласнасьці і актываў групы высокіх чыноўнікаў, уключна з Аляксандрам Лукашэнкам. Санкцыі распаўсюджваліся таксама і на сем’і гэтых чыноўнікаў. Ім таксама забаранілі ўезд на тэрыторыю ЗША.

Пазьней асобам, у тым ліку і новым, якія папоўнілі сьпісы, забаранілі мець актывы на тэрыторыі ЗША і весьці бізнэс з амэрыканскімі партнэрамі.

Пасьля прэзыдэнцкіх выбараў у Беларусі напрыканцы 2010 году ЗША пашырылі сьпіс беларускіх чыноўнікаў, якім забаронены ўезд у ЗША. Акрамя таго, грамадзянам ЗША забаранілі весьці бізнэс зь дзяржаўным канцэрнам «Белнафтахім» і шэрагам іншых прадпрыемстваў. Гэтак Злучаныя Штаты адрэагавалі на рэпрэсіі пасьля выбараў, у тым ліку на зьняволеньне шэрагу кандыдатаў у прэзыдэнты.

Пра якія беларускія прадпрыемствы ідзе гаворка

«Белнафтахім»,
«Белнафтахім ЗША»,
«Нафтан»,
«Беларускі нафтавы гандлёвы дом»,
«Белшына»,
«Гродна Азот»,
«Гроднахімвалакно»,
ААТ «Лякафарба»,
ААТ «Полацак-Шкловалакно».

Прадпрыемствам i грамадзянам ЗША было забаронена ўступаць у эканамічныя і фінансавыя дачыненьні з гэтымі арганізацыямі, а ўся іх маёмасьць і рахункі, якія знаходзяцца на тэрыторыі ЗША, былі замарожаныя. Да таго ж многія краіны і кампаніі адмаўляюцца працаваць з прадпрыемствамі, якія знаходзяцца пад санкцыямі ЗША.

У кастрычніку 2015 году Міністэрства фінансаў ЗША прыпыніла санкцыі супраць гэтых дзевяці беларускіх прадпрыемстваў у сувязі з «пэўным прагрэсам у сфэры дэмакратыі і правоў чалавека», а таксама з мэтай падтрымкі незалежнасьці і сувэрэнітэту Беларусі.
Пасьля прэзыдэнцкіх выбараў у Беларусі ў жніўні 2020 году і рэпрэсій, якія адбыліся пасьля іх, ЗША аднавілі санкцыі ад 3 чэрвеня 2021 году. Адпаведнае рашэньне 19 красавіка 2021 году апублікавала Міністэрства фінансаў ЗША. Злучаныя Штаты дабіваюцца вызваленьня ўсіх палітвязьняў.