Праз чатыры месяцы дзеяньня забароны выявілася, што ў Беларусі не вырабляюць патрэбнай колькасьці экалягічнай упакоўкі і што яна ў 2–4 разы даражэйшая за плястыкавую.
Міністэрства антыманапольнага рэгуляваньня і гандлю выставіла на абмеркаваньне зьмены ў сваю ж пастанову, якая забараняе з 1 студзеня 2021 году выкарыстаньне аднаразовага посуду з плястыку ў грамадзкім харчаваньні.
Міністэрства хоча зноў дазволіць плястыкавыя
- кубачкі абʼёмам 300 мл і больш,
- трубачкі і саломінкі для напояў,
- кантэйнэры,
- латкі,
- ланч-боксы,
- корэксы (гэта такія ячэістыя падкладкі — напрыклад, для цукерак),
- слоікі,
- бутэлькі.
Чым МАРГ тлумачыць вяртаньне плястыкавага посуду
- Клопатам пра належную якасьць і захоўваньне прадукцыі.
- Адсутнасьцю патрэбнай колькасьці беларускай упакоўкі з экаматэрыялаў.
- Магчымым ростам цэнаў, бо экалягічная ўпакоўка даражэйшая за плястыкавую ў 2–4 разы.
Міністэрства паведаміла, што аднаразовыя відэльцы, лыжкі, нажы і трубачкі з экаматэрыялаў у Беларусі пачалі вырабляць толькі на пачатку 2021 году, то бок пасьля ўвядзеньня забароны. Дагэтуль вырабляюць толькі каля траціны ад патрэбнай колькасьці кубачкаў і латкоў. Няма альтэрнатывы для слоікаў, бутэлек, а таксама ўпаковак, прызначаных для газамадыфікаванага асяродзьдзя, вакуўму і шокавай замарозкі.
Які аднаразовы плястыкавы посуд застанецца пад забаронай
- відэльцы,
- лыжкі
- нажы,
- палачкі для разьмешваньня напояў,
- кубачкі абʼёмам да 300 мл,
- талеркі,
- каробкі, за выняткам прызначаных для кулінарных паўфабрыкатаў і кандытарскіх вырабаў,
- кубкі з вушкам.
У студзені 2019 году Аляксандар Лукашэнка даў даручэньне адмовіцца ад плястыкавых бутэлек і замяніць іх шклянымі. У сакавіку таго ж году ён загадаў Саўміну паэтапна зьнізіць выкарыстаньне поліэтыленавых пакетаў і замяніць іх на больш экалягічныя шкло і паперу.
З 2021 году ў Эўразьвязе забаранілі выкарыстоўваць аднаразовыя вырабы з плястыку.
