Лінкі ўнівэрсальнага доступу

З нагоды Сусьветнага дня свабоды прэсы прэзыдэнт РСЭ/РС Джэймі Флай нагадаў пра беларускіх журналістаў


Прэзыдэнт РСЭ/РС Джэймі Флай

Свабода СМІ ў 23 краінах, у якіх працуе Радыё Свабодная Эўропа / Радыё Свабода, застаецца пад моцным ціскам, што прадэманстравана дзеяньнямі ўладаў супраць журналістаў і іх працы.

Прэзыдэнт РСЭ/РС Джэймі Флай выступіў з заявай з нагоды Сусьветнага дня свабоды прэсы, у якой, сярод іншага, сказаў:

«У Расеі, Беларусі, Аўганістане і многіх іншых краінах нашага рэгіёну журналісты РСЭ/РС і іх калегі зь іншых мэдыйных арганізацыяў усё часьцей зазнаюць напады. Сусьветны дзень свабоды прэсы дае нагоду падзякаваць адважным мужчынам і жанчынам, якія сваёй журналісцкай працай выкрываюць несправядлівасьць, нагадваюць лідэрам пра іх адказнасьць і інфармуюць сваіх суграмадзянаў.

21 красавіка кансультант РСЭ/РС у сацыяльных сетках Ігар Лосік адзначыў свой 300-ы дзень у СІЗА ў Беларусі. Затрыманы 25 чэрвеня 2020 году пасьля ператрусу ў кватэры ў беларускім горадзе Баранавічы, Лосік быў абвінавачаны ўладамі ў выкарыстаньні яго папулярнага блогу ў Telegram для „падрыхтоўкі да парушэньня грамадзкага парадку“ напярэдадні спрэчных прэзыдэнцкіх выбараў 9 жніўня ў Беларусі... З таго часу ўлады дадалі невядомыя дадатковыя абвінавачаньні супраць Лосіка, які трымаў дзьве галадоўкі на знак пратэсту супраць свайго затрыманьня.

Апроч Лосіка, шмат іншых журналістаў Радыё Свабода, выконваючы журналісцкую працу дзеля асьвятленьня выбараў і іх наступстваў, зазналі перасьлед, затрыманьні, зьняволеньне і пазбаўленьне акрэдытацыі. 2 кастрычніка 2020 году МЗС Беларусі скасаваў акрэдытацыю ўсім журналістам, якія працуюць у замежных мэдыя-арганізацыях краіны. На сёньняшні дзень ніводзін грамадзянін Беларусі, які працуе ў заходніх СМІ, ня быў акрэдытаваны паводле новых працэдураў».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG