Лінкі ўнівэрсальнага доступу

Прэзыдэнт Радыё Свабода заклікаў Лукашэнку вызваліць Ігара Лосіка


Джэймі Флай

Прэзыдэнт Радыё Свабодная Эўропа/Радыё Свабода Джэймі Флай выступіў з заявай наконт справы блогера Ігара Лосіка, супраць якога сёньня выставілі новыя абвінавачваньні.

Сёньня кансультанту Радыё Свабода і адміністратару тэлеграм-каналу «Беларусь головного мозга» выставілі новае абвінавачаньне. Паводле якога артыкулу, пакуль невядома.

Пасьля гэтага на вачах у сьледчага і адваката ён спрабаваў парэзаць сабе рукі і абвясьціў на знак пратэсту сухую галадоўку.

«Мы ўсе ў Радыё Свабодная Эўропа / Радыё Свабода глыбока засмучаныя новымі абвінавачаннямі супраць Ігара і пагаршэннем яго стану здароўя. Журналістыка не зьяўляецца злачынствам, і Ігар занадта доўга знаходзіцца пад арыштам. Нельга такім чынам катаваць Ігара і яго сям’ю. Я заклікаю Аляксандра Лукашэнку неадкладна вызваліць Ігара, каб ён мог узьяднацца з жонкай і дачкой», — заявіў Джэймі Флай.

Жонка палітвязьня Дар’я Лосік зьвярнулася да Лукашэнкі, каб той адказаў ёй, чаму яе муж дзевяць месяцаў знаходзіцца ў турме.

Крымінальны перасьлед Ігара Лосіка

На адміністратара суполкі «РБ головного мозга» і фрылансэра-кансультанта Радыё Свабода Ігара Лосіка завялі крымінальныя справы паводле ч. 1 арт. 342 Крымінальнага кодэксу («падрыхтоўка да парушэньня грамадзкага парадку») і ч. 2 арт. 293 («падрыхтоўка да ўдзелу ў масавых беспарадках»).

Лосіка затрымалі 25 чэрвеня 2020 года пасьля ператрусу дома ў Баранавічах. На ягоны тэлеграм-канал «РБ головного мозга» ў той момант былі падпісаныя 167 тысяч чалавек.

Ігар Лосік актыўна асьвятляў падзеі выбараў прэзыдэнта Беларусі. Праваабаронцы прызналі яго палітвязьнем.

15 сьнежня пасьля выстаўленьня другога абвінавачаньня Ігар Лосік абвясьціў галадоўку пратэсту і трымаў яе да 25 студзеня.

11 сакавіка 2021 года Лосіку выставілі новае абвінавачаньне. На знак пратэсту Ігар пашкодзіў сабе запясьце на вачах у адваката і сьледчага, а таксама абвясьціў сухую галадоўку. За гэта Лосіка зьмясьцілі ў карцар сьледчай турмы Жодзіна. Там ён прабыў пяць дзён, чатыры зь якіх трымаў сухую галадоўку.

Па якім артыкуле Лосіку выставілі новыя абвінавачаньні, невядома. Ягоны адвакат Дзьмітрый Лепрэтар пад падпіскай аб неразгалошваньні.

Дома Ігара чакаюць жонка і двухгадовая дачка.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG