Лінкі ўнівэрсальнага доступу

Праваабаронцы прызналі палітвязьнем капітана, які скапіяваў сакрэтны ліст пра ўжываньне войска супраць пратэстоўцаў


Дзяніс Урад

Са сродкаў масавай інфармацыі праваабаронцам стала вядома, што ў сакавіку 2021 году затрымалі і ўзялі пад варту праз абвінавачваньне ў дзяржаўнай здрадзе капітана Дзяніса Урада.

Капітан Урад, знаходзячыся на дзяжурстве на пасадзе спэцсувязі Генштабу Ўзброеных сіл, сфатаграфаваў сакрэтны ліст ад міністра ўнутраных спраў міністру абароны аб «уцягваньні вайскоўцаў Узброеных сіл у дзейнасьць па падтрыманьні правапарадку» і накіраваў копію тэлеграм-каналу.

Праваабаронцы, ацэньваючы інфармацыю пра ўчынак Д. Урада і прынятых да яго рэпрэсіўных мер, зыходзілі зь Міжнароднага пакту аб грамадзянскіх і палітычных правах. Згодна зь ім, нельга спасылацца на законы аб дзяржаўнай здрадзе і службовай тайне, калі ідзе размова аб спробе ўтаіць ад шырокай грамадзкасьці інфармацыю, якая мае законны грамадзкі інтарэс і не пагражае нацыянальнай бясьпецы. Паводле праваабаронцаў, караць за пашырэньне такой інфармацыі, як за дзяржаўную здраду, нельга.

«Няма сумневу, што Д. Урад дзейнічаў у грамадзкіх інтарэсах, а абгрунтаваньне міністрам унутраных спраў мэты прыцягненьня вайскоўцаў да паліцэйскіх функцый „для аховы аб’ектаў, якія падлягаюць дзяржаўнай ахове, што забясьпечваюць жыцьцядзейнасьць насельніцтва і функцыянаваньне транспарту, і абʼектаў, якія ўяўляюць павышаную небясьпеку для жыцьця і здароўя людзей“ — гэта маніпуляцыя нормамі закону», — лічаць праваабаронцы. У якасьці прыкладу яны прыводзяць вёскі Бараўляны і Копішча Менскага раёну, куды плянавалася накіраваць 50 вайскоўцаў, а там такіх абʼектаў няма, а ёсьць ачагі мірнай пратэставай актыўнасьці грамадзянаў (комплекс «Новая Баравая» ў в. Копішча).

Праваабарончая супольнасьць прызнала таксама палітзьняволенай актывістку Вольгу Маёраву, якая мадэравала тэлеграм-канал Мікалая Аўтуховіча, а цяпер ёй закідаюць тэрарызм. «Нават зь сюжэту, паказанага па тэлевізіі, вынікае, што Маёрава толькі камэнтавала падзеі ад імя Аўтуховіча, ня быўшы дасьведчанай у яго канкрэтных плянах і дзеяньнях, шукаючы інфармацыю пра іх у інтэрнэце», — лічаць праваабаронцы.

Па стане на 29 красавіка ў Беларусі прызнаныя палітычнымі вязьнямі 360 чалавек, паведамляе «Вясна».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG