Лінкі ўнівэрсальнага доступу

Амбасадарка ЗША Джулі Фішэр сустрэлася з прадстаўнікамі штабу Віктара Бабарыкі


Іван Краўцоў, Антон Раднянкоў, Джулі Фішэр і Тацяна Хоміч.

26 красавіка прадстаўнікі аргкамітэту партыі «Вместе» экс-прэтэндэнта на пасаду прэзыдэнта Віктара Бабарыкі сустрэліся з амбасадаркай ЗША ў Беларусі.

У тэлеграм-канале зьняволенага палітыка ўдакладняецца, што Іван Краўцоў, Антон Раднянкоў і Тацяна Хоміч падчас сустрэчы з Джулі Фішэр асаблівую ўвагу аддалі парадку дня падрыхтоўкі да перамоваў з уладай і сцэнарам выхаду з палітычнага крызісу.

Таксама абмяркоўвалася агульная стратэгія дзеяньняў дэмакратычных сіл, палітычны перасьлед Віктара Бабарыкі, Марыі Калесьнікавай і каманды штабу, ціск на адвакатуру і грамадзянскую супольнасьць, парушэньне правоў палітычных зьняволеных.

«Злучаныя Штаты добра інфармаваныя адносна сытуацыі ў Беларусі, і задача вырашэньня палітычнага крызісу застаецца адной з прыярытэтных у зьнешнепалітычных дзеяньнях», — сказана ў паведамленьні.

Да таго Джулі Фішэр сустрэлася ў Вільні зь лідэрам дэмакратычных сілаў Сьвятланай Ціханоўскай.

Штаб экс-прэтэндэнта на прэзыдэнцкую пасаду ў канцы сакавіка адкрыў збор заявак ад ахвотных уступіць у партыю «Вместе». Сам Віктар Бабарыка ад сярэдзіны чэрвеня мінулага году ўтрымліваецца за кратамі нібыта за «эканамічныя злачынствы».

У канцы мінулага году Дзярждэпартамэнт зацьвердзіў Джулі Фішэр амбасадаркай у Беларусі — ад 2008-га пасада заставалася вакантнай. Аднак сёлета ў інтэрвію Нацыянальнаму грамадзкаму радыё ЗША яна заявіла, што ня можа прыехаць у Беларусь, бо ня мае дыпляматычнай візы.

Кіраўнік МЗС Беларусі Ўладзімер Макей днямі заявіў, што Менск гатовы прыняць амэрыканскага амбасадара ў любы час, але хоча мець «выразную і зразумелую пэрспэктыву далейшага ўзаемадзеяньня па ўсіх напрамках».

Літоўскае зьнешнепалітычнае ведамства выказала гатоўнасьць акрэдытаваць Джулі Фішэр, што кіраўніцтва Беларусі рэзка скрытыкавала.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG