Лінкі ўнівэрсальнага доступу

Ва Ўкраіне ўвялі новыя абмежаваньні ў памежных зь Беларусьсю раёнах. Выведка заяўляе пра новыя пагрозы з Расеі


Украінскія вайскоўцы каля мяжы зь Беларусьсю, архіўнае фота

У Ровенскай вобласьці Ўкраіны ў памежных зь Беларусьсю раёнах увялі дадатковыя абмежаваньні памежнага кантролю, якія будуць дзейнічаць да канца 2021 году.

У прыватнасьці, пра любыя працы ў памежжы мясцовыя ўлады і камунальныя службы мусяць паведамляць памежнікам за 6 гадзін да іх пачатку.

Па дарогах, якія вядуць да мяжы, забаранілі з 22.00 да 6.00 рух транспарту. Забаранілі таксама стаянку аўтамабіляў на нэўтральнай паласе між Беларусьсю і Ўкраінай. Пра палёты лёгкаматорных самалётаў і дронаў трэба папярэджваць цяпер за 24 гадзіны, і ня менш як за гадзіну — пра вадалазныя працы ці выхад невялікіх суднаў і іншых плаўсродкаў на азёры і іншыя вадаёмы, якія знаходзяцца ў памежным раёне.

Кіроўцам забаранілі падвозіць пасажыраў, якія ня маюць дакумэнтаў, што пацьвярджаюць іхную асобу.

Увечары 11 красавіка прадстаўнік Галоўнага ўпраўленьня выведкі Міністэрства абароны Ўкраіны Вадзім Скібіцкі заявіў пра павелічэньне расейскай вайсковай пагрозы.

«На сёньняшні дзень адна з вайсковых пагрозаў — нарошчваньне расейскіх войскаў каля дзяржаўнай мяжы Ўкраіны. І менавіта таму мы лічым, што ёсьць павелічэньне ўзроўню гэтай пагрозы, і яна зьвязаная з нарошчваньнем і з актыўнымі захадамі баявой і апэратыўнай падрыхтоўкі каля нашых межаў. Раней мы такога не назіралі. Такія вялікія перамяшчэньні былі ў 2014–2015 гадах, калі пачалася непасрэдная агрэсія Расейскай Фэдэрацыі супраць Украіны», — заявіў Вадзім Скібіцкі ў эфіры Вайсковага тэлебачаньня Ўкраіны.

Раней украінскія карыстальнікі сацыяльных сетак паведамлялі пра перамяшчэньні расейскай вайсковай тэхнікі за 60 кілямэтраў ад мяжы з Ровенскай вобласьцю.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG